Սամվել Կարապետյան․ ՔԿ են կանչվել Տաշիրի կարի ֆաբրիկայի 150 դերձակներ

Արմինֆո. Հունիսի 3-ին քննչական բաժին են կանչվել Տաշիրի կարի ֆաբրիկայի 150 աշխատակիցներ: Այդ մասին  հունիսի 2-ին դատարանի շենքի առջեւ հայտարարել է "Ուժեղ Հայաստան" կուսակցության առաջնորդ Սամվել Կարապետյանը՝ մեկնաբանելով "Ուժեղ Հայաստան" կուսակցության խորհրդի անդամ Ալիկ Ալեքսանյանի եւ քաղաքական ուժի կողմնակիցների ձերբակալությունը։

Ընդ որում, ինչպես ուշադրություն է հրավիրել Կարապետյանը, խոսքը ոչ թե ֆաբրիկայի ղեկավարների, այլ դերձակների մասին է։ "Նրանց ծանուցագրեր են ուղարկվել, որ պետք է ներկայանան քննչական բաժին։ Հիմա սա ինչ է, միթե՞ վարչական ռեսուրսի չարաշահում չէ", - հռետորական հարց է ուղղել "Ուժեղ Հայաստան" կուսակցության առաջնորդը։

Ընդհանուր առմամբ, Կարապետյանի հավաստմամբ, ձերբակալվել է իր կուսակցության շուրջ 500 կողմնակից, քրեական գործեր են հարուցվել 30-40 մարդու նկատմամբ: "Կգա ժամանակը, և շուտով դուք ամեն ինչ կիմանաք։ Սա այն ամենն է, ինչ ես առայժմ կարող եմ ասել", - ամփոփել է կուսակցության առաջնորդը։

Հիշեցնենք, որ ավելի վաղ ՀՀ Քննչական կոմիտեից հաղորդել էին "Ուժեղ Հայաստան" կուսակցության խորհրդի անդամ Ալիկ Ալեքսանյանին ձերբակալելու մասին: Գերատեսչությունից հաղորդել են, որ Ալեքսանյանն անցնում է հավաքներին մասնակցելու համար քաղաքացիներին նյութական խրախուսման և առանձնապես խոշոր չափերով փողերի լվացման գործով: Նրան ոստիկանությունը ձերբակալել է ՝ խափանման միջոց կալանավորումն ընտրելու միջնորդությամբ դատարան դիմելու նպատակով։ Հաղորդվում է նաև, որ հետաքննության ընթացքում ուժայինները հարցաքննել են մոտ 500 մարդու: