Պուտին. Եթե հանրաքվեի արդյունքներով հայ ժողովուրդն ընտրեր եվրոպական ուղին, Ռուսաստանը կարող էր սկսել «ինտելիգենտ ամուսնալուծության» գործընթաց

Արմինֆո. Հայաստանի իշխանությունները կարող էին հանրաքվե անցկացնել ԵՄ-ին անդամակցելու հարցով, և եթե հայ ժողովուրդն աջակցի դրան, Ռուսաստանը կարող էր սկսել «ինտելիգենտ ամուսնալուծության» գործընթաց։ Այս մասին լրագրողներին հայտարարել է Ռուսաստանի նախագահ Վլադիմիր Պուտինը։

Նա հիշեցրել է, որ հայ և ռուս ժողովուրդների միջև դարեր շարունակ եղել են առանձնահատուկ հարաբերություններ։ Նա հավելել է, որ եթե այս կամ այն որոշումը ձեռնտու է հայ ժողովրդին, Ռուսաստանում դեմ չեն լինի։ «Բայց, իհարկե, մենք պետք է հաշվի առնենք որոշ հանգամանքներ, որոնք կարևոր են և՛ մեզ համար, և՛ մեր գործընկերների համար», - շարունակել է նա։

Մանրամասնելով ասվածը՝ Պուտինը փաստել է, որ այս տարի ՌԴ-ի ապրանքաշրջանառությունը Հայաստանի հետ նվազել է նախորդ կամ նախնախորդ տարվա համեմատ, բայց այնուամենայնիվ կազմել է 7 միլիարդ դոլար։ «Եթե հաշվի առնենք, որ երկրի ՀՆԱ-ն հավասար է 29 միլիարդ դոլարի, ապա սա լուրջ մեծություն է։ Եվ Հայաստանը զգալի առավելություններ է ստանում ԵԱՏՄ շրջանակներում։ Դա վերաբերում է գյուղատնտեսությանը, վերամշակող արդյունաբերությանը, մաքսային և այլ տուրքերին, վերաբերում է միգրացիոն քաղաքականությանը և այլն, և այլն», — հավելել է նա։

Այս համատեքստում Ռուսաստանի առաջնորդը ճիշտ է համարել, այդ թվում սեփական ժողովրդի և Ռուսաստանի՝ որպես գլխավոր տնտեսական գործընկերոջ նկատմամբ, հնարավորինս շուտ կողմնորոշվել ԵՄ-ին կամ Եվրասիական տնտեսական միությանը Հայաստանի անդամակցության հարցում։ «Դե, օրինակ՝ անցկացնել հանրաքվե։ Դա մեր գործը չէ, բայց սկզբունքորեն լիովին տրամաբանական կլիներ անցկացնել հանրաքվե և հարցնել Հայաստանի քաղաքացիներին, թե որն է լինելու նրանց ընտրությունը։ Եվ դրան համապատասխան մենք էլ կանեինք համապատասխան հետևություններ և կգնայինք, այսպես ասած, մեղմ, նման ինտելիգենտ և փոխշահավետ ամուսնալուծության ճանապարհով», - ասել է նա։

Պուտինը հիշեցրել է, որ Ուկրաինայի դեպքում նույնպես ամեն ինչ սկսվել էր եվրաինտեգրման հարցից։ Անդրադառնալով Մոսկվայում Հաղթանակի շքերթին՝ Պուտինը նշել է, որ ՌԴ-ում չեն նեղանում նրանցից, ովքեր մայիսի 9-ին չեն ժամանել Ռուսաստանի մայրաքաղաք, այդ թվում՝ Հայաստանից։