Դադարեցվել է քրեական հետապնդումը ԱԺԲ խորհրդի անդամի որդու նկատմամբ, ով դավաճանության մեջ էր մեղադրել Փաշինյանին

Արմինֆո. Երևան քաղաքի առաջին ատյանի քրեական դատարանը դադարեցրել է Բևեռի խորհրդի անդամ Վարուժան Ավետիսյանի որդու՝ Դավիթ Ավետիսյանի նկատմամբ իրականացվող քրեական հետապնդումը։ Այդ մասին հաղորդում է Ազգային-ժողովրդավարական բեւեռի (ԱԺԲ ) մամուլի  ծառայությունը, հավելելով, որ Դավիթը արդար և անպարտ է։

Ինչպես հիշեցնում է քաղաքական ուժը, 2023 թվականի հուլիսի 2-ի կեսօրին Դավիթ Ավետիսյանը «Անգլիական» այգու մոտ հանդիպել էր Նիկոլ Փաշինյանին և վերջինիս ասել, որ պատասխան է տալու մեր նահատակված հերոսների համար, որից հետո Դավիթին բռնությամբ բերման էին ենթարկել ոստիկանության Կենտրոնի բաժին, ձերբակալել և մեղադրանք առաջադրել:

«2024 թվականի նոյեմբերին Երևանի ընդհանուր իրավասության քրեական դատարանը՝ դատավոր Ռոման Սմբատյանի նախագահությամբ, մեղավոր ճանաչեց Դավիթ Ավետիսյանին և որպես պատիժ նշանակեց տուգանք՝ 525․000 դրամի չափով:

Այս վճիռը Վերաքննիչ դատարանը բեկանեց, ուղարկեց նոր քննության, որի արդյունքներով Դավիթ Ավետիսյանն արդարացվեց և նրա նկատմամբ հետապնդումը դադարեցվեց», - ասվում է ԱԺԲ հաղորդագրությունում: