Ընդդիմադիր պատգամավոր․ Հայաստանի իշխանությունները փորձում են մոռացության մատնել հայ ժողովրդի զավակների հերոսությունը ադրբեջանական ագրեսիայի դեմ

Արմինֆո.Հայաստանի խորհրդարանի ընդդիմադիր "Հայաստան" խմբակցության պատգամավոր Գեղամ Մանուկյան արձագանքել է ՀՀ վարչապետ Նիկոլ Փաշինյանի օդիոզ հայտարարությանը,  թե՝ Արցախի ժողովուրդը "փախել է և չի կռվել" 2023 թվականի ադրբեջանական ագրեսիայի ընթացքում։

Պատգամավորը Facebook-ի իր էջին տեսաուղերձում հիշեցրել է, որ դեռևս 2024 թվականի փետրվարին գրավոր հարցում է ուղարկել ՀՀ պաշտպանության նախարար Սուրեն Պապիկյանին, որում պաշտպանական գերատեսչության ղեկավարից հետաքրքրվել է 2023 թվականի սեպտեմբերի 19-20-ը Արցախի դեմ Ադրբեջանի ագրեսիայի հետևանքով զոհված զինծառայողների, կամավորականների, պայմանագրային զինծառայողների, խաղաղ բնակիչների թվի մասին։ Նրա խոսքով ՝ ինքը հետաքրքրվել է նաև վերը նշված քաղաքացիների մահվան հանգամանքներով։

"Մարտի 13-ին ՀՀ պաշտպանության նախարարության կողմից գրավոր պատասխան է ստացվել գաղտնիության մակագրությամբ ։ Դա արվել է նրա համար, որ ես չկարողանամ հրապարակել այն զինծառայողների ցանկը, որոնք հավասար պայմաններում չեն կռվել թշնամու դեմ և դավաճանվել են Հայաստանի Զինված ուժերի բարձրագույն ղեկավարության կողմից", - հաղորդել Է Մանուկյանը։  

Պատգամավորը, միաժամանակ, ցավով նշել է, որ իր մեղքի բաժինն ունի նաև Արցախի պաշտպանության նախարարության այն օրերի ղեկավարությունը, որը մինչ օրս իր ձայնը չի բարձրացրել և չի ներկայացրել իրական պատկերը: Մինչդեռ, ըստ Մանուկյանի, այսօր չի խոսվում Ճանկաթաղ գյուղի 716 դիրքերի մասին, որտեղ մարտական հերթապահություն իրականացնող 10 զինծառայողներից 3-ը զոհվել են, 2-ը՝ վիրավորվել, ինչպես չի խոսվում Մարտակերտի շրջանի Վանք գյուղի 812 դիրքերի մասին, որտեղ հերոսաբար զոհվել է Տիգրան Ավետիսյանը (Արցախի Վանք գյուղի պաշտպանությունն էր իրականացնում ՝ մարտնչելով Նարեշտար և Չարեքթար բնակավայրերի դիրքերում, հրամանատարի վիրավորվելուց հետո հրաժարվել է լքել մարտական դիրքը-խմբ.):

Պատգամավորը հիշեցրել է, որ ավելի վաղ ինքն է հրապարակել բաց աղբյուրներից հավաքագրված զինծառայողների անվանացոուցակը՝ 265 զոհ և անհետ կորած, ովքեր մարտեր են մղել այն օրերին՝ անհավասար պայմաններում։ "Յուրաքանչյուր նման դիրքի մասին կարելի է շատ խոսել, և դա այն է, ինչ են փորձում մոռացության մատնել ՀՀ պաշտպանության նախարարությունը և գործող իշխանությունը", - ընդգծել է ընդդիմադիր պատգամավորը։

Այնուհետև, Մանուկյանն ուշադրություն է հրավիրել, որ պաշտպանության նախարարին ուղղված իր հարցման մեջ ինքը նաև հարց է ուղղել, թե արդյոք ուսումնասիրել են հրամանատարական կազմի ստորաբաժանումների մարտական խնդիրների կատարման արդյունավետությունն ու փոխգործակցությունը, ինչպես նաև խնդրել է ներկայացնել ընդհանուր պատկերը: Պատգամավորի խոսքով ՝ իրեն պատասխանել են, որ   , հաշվի առնելով այդ օրերին Արցախի բնակչության բռնի տեղաշարժը և այն փաստը, որ բոլոր փաստաթղթերը մնացել են Արցախի տարածքում, որևէ ուսումնասիրություն չի կատարվել: Դրանից պատգամավորը եզրակացրել է, որ Հայաստանի վարչապետը հերթական անգամ ստել է ՝ կեղծ մեղադրանքներ առաջ քաաշելով և շահարկելով, որ եթե մի օր բացահայտեն այդ փաստաթղթերը, պարզ կդառնա, որ, իբր, "Արցախի Պաշտպանության բանակը չի կռվել":

Մանուկյանն ուշադրություն է հրավիրել այն հանգամանքին, որ այսօր ՀՀ գործող իշխանությունները փորձում են մոռացության մատնել ոչ միայն 2023 թվականի սեպտեմբերի 19-20-ի դեպքերը, այլև 2022 թվականի սեպտեմբերի 13-14-ի ադրբեջանական ագրեսիան, ինչպես նաև այն հերոսների անունները, այդ թվում ՝ Արցախի Պաշտպանության բանակի և Արցախի հատուկ նշանակության ստորաբաժանումների, որոնք 2022 թվականի սեպտեմբերին Ջերմուկի ուղղությամբ ադրբեջանական ագրեսիայի ժամանակ օգնության են հասել Հայաստանին և ովքեր զոհվել են 2023 թվականի սեպտեմբերին մարտի դաշտում ԼՂՀ պաշտպանելիս։

"Ինչքան ստոր պետք է լինել, որ այդ մասին չխոսեն։ Ով է փախել, ով է խախտել օրենքը, ով է խախտել կարգը, ով է խախտել ՀՀ Անվտանգության խորհրդի կողմից ընդունված զինված ուժերի կիրառման պլանը և վաղը այդ ամենի համար պատասխան է տալու դատարանի առջև: Ցավոք, երկրի անվտանգության ապահովման համար պատասխանատվությունն ինձ հիմա հնարավորություն չի տալիս, որ ես հիմա այդ մասին բացահայտ խոսեմ։ Բայց այն, որ եղել են մրադիկ, ովքեր օրենք են խախտել և հանցագործություններ կատարել ՝ զինվորականներից մինչև ՀՀ վարչապետ Նիկոլ Փաշինյան, այդ մասին մի օր կխոսվի արդարադատության առջև", - եզրափակել է Մանուկյանը:

Նշենք, որ մարտի 26-ին ՀՀ վարչապետ Նիկոլ Փաշինյանը ճեպազրույցի ժամանակ հայտարարել էր, թե, իբր, Արցախի վերնախավը 2023 թվականին չի կռվել ՝ փախչելով հանրապետությունից ։ Նա հերթական անգամ հայտարարել է, որ "եթե ուզում էին ապրել իրենց հողի վրա, թող մնային ու կռվեին, այլ ոչ թե փախչեին" ։ Ընդ որում, Փաշինյանը լռության է մատնել այն փաստը, որ Հայաստանը՝ ԼՂՀ անվտանգության երաշխավորը, հանրապետությանը մենակ է թողել 10 մլն Ադրբեջանի դիմաց։

Նշենք, որ 2023 թվականի սեպտեմբերի 19-20-ն Արցախի դեմ ագրեսիայի ընթացքում ադրբեջանական կողմի պաշտոնապես ճանաչված կորուստները կազմել են 205 սպանված, տարբեր աստիճանի վիրավորների թիվը գերազանցել է 500-ը ։ Միևնույն ժամանակ, ոչ պաշտոնական տվյալներով, այդ մարտում զոհվել է ավելի քան 1000 թշնամու զինվոր: