ԱԺ փոխնախագահ․ Լեռնային Ղարաբաղում 44-օրյա պատերազմի պատճառը ուժերի ռազմական հավասարակշռության խախտումն էր՝ հօգուտ Ադրբեջանի

Արմինֆո.Լեռնային Ղարաբաղում 44-օրյա պատերազմի պատճառը ուժերի ռազմական հավասարակշռության խախտումն էր ՝ հօգուտ Ադրբեջանի։ Այդ մասին դեկտեմբերի 3-ին լրագրողների հետ զրույցում հայտարարել է  ԱԺ փոխնախագահ Ռուբեն Ռուբինյանը։

Նրա խոսքով, այն մասին, որ Լեռնային Ղարաբաղի շուրջ բանակցությունները փակուղի են մտել, ՀՀ երրորդ նախագահ Սերժ Սարգսյանը խոսել էր դեռևս 2018 թվականին: Այն ժամանակ էլ նա նշել էր  հույսի բացակայությունը, որ Ադրբեջանը չի փորձի հարցը լուծել ռազմական ուժով ։

"44-օրյա պատերազմը տեղի ունեցավ երկու պատճառով։ Առաջին և գլխավոր պատճառն այն է, որ 1998 թվականի դրությամբ Հայաստանի և Ադրբեջանի ռազմական բյուջեների հարաբերակցությունը գրեթե հավասար էր, իսկ երբ Ռոբերտ Քոչարյանը Հայաստանում ավարտում էր իր նախագահական ժամկետը, այդ հարաբերակցությունը 1-5 էր՝ հօգուտ Ադրբեջանի։ Սերժ Սարգսյանի օրոք այդ տարբերությունն ավելի մեծացավ, և մենք ժառանգեցինք բյուջեի այդ մեծ տարբերությունը, որն, ի դեպ, մեր օրոք կրճատվեց։ Դրան զուգահեռ ավելի քան զգալի տեմպերով աճել են Քոչարյանի և Սարգսյանի ընտանեկան բյուջեները", - նշել է Ռուբինյանը։

Որպես երկրորդ պատճառ նա նշել է այն, որ բանակցային փաթեթն ի սկզբանե եղել է այն մասին, թե ինչպես Ադրբեջանին վերադարձնել յոթ շրջանները, և ինչպես վարվել Լեռնային Ղարաբաղի հետ: "Պետք է հասկանալ, որ այդ պահին գրեթե բոլորը Լեռնային Ղարաբաղը ճանաչում էին որպես Ադրբեջանի տարածքի մաս ։ Ընդ որում, բանակցային գործընթացներում պայմանները անընդհատ վատանում էին, և Ադրբեջանը, նույնիսկ, դրանց չէր համաձայնում, քանի որ յուրաքանչյուր հաջորդ փաստաթուղթ իր համար ավելի լավն էր, քան նախորդը ։ Միակ փաստաթուղթը, որին վերջին անգամ համաձայնել է կողմերից մեկը՝ Հայաստանը, Կազանի փաստաթուղթն էր։ Ընդ որում, չի եղել որևէ փաստաթուղթ, որին Ադրբեջանը համաձայներ, իսկ Հայաստանը մերժեր", - ընդգծել է Ռուբինյանը։ Փոխխոսնակի ասելով ՝ երրորդ նախագահ Սերժ Սարգսյանն ինքն է ասել, որ 2018 թվականի փաստաթղթով, որը դրվել է 2019 թվականի փաստաթղթի հիմքում, հայկական կողմը գնում է իրական տարածքային զիջումների, իսկ Ադրբեջանը ՝ ոչ: "Նա ասում էր, որ Լեռնային Ղարաբաղի միջանկյալ և վերջնական կարգավիճակի հարցերը մնում են լղոզված, որ Ադրբեջանը հաջորդ փուլով կցանկանա վերահսկել մնացած տարածքները։ Ավելին, այս փաստաթղթից ուղղակիորեն չի հետևում, որ Լաչինի շրջանը, բացի Լաչինի միջանցքից, և Քելբաջարի շրջանները մնում են Լեռնային Ղարաբաղի վերահսկողության տակ։ Եթե ընդդիմությունը մեզ դավաճան է անվանում, ինչու՞ իրենք դեռ 2016 թվին չընդունեցին առաջարկները, եթե այդ առաջարկներն այդքան լավն էին։ Եթե այդ առաջարկները վատն էին, ինչու է ընդդիմությունը մեզ մեղադրում և հարցնում, թե ինչու չընդունեցինք այդ առաջարկները", - հայտարարել է Ռուբինյանը, հավելելով, որ զոհեր, միևնույն է, կլինեին, քանի որ պատերազմը սկսվելու էր հայկական կողմի համար ավելի վատ մեկնարկային դիրքերից:

Նա նաեւ նշել է,  որ 2022 թվականի Պրահյան հայտարարությունը որևէ փոփոխություն չի մտցրել 2020 թվականի նոյեմբերի 9-ի հայտարարության էության մեջ ։ Առավել ևս, որ դա որևէ փոփոխություն չի մտցրել Լեռնային Ղարաբաղում ռուս խաղաղապահների գործառույթում