Երևանը կլցվի սարոյանական գույներով. սեպտեմբերի 5-11-ը մայրաքաղաքում մեկնարկում են "Սարոյանական օրերը"

Արմինֆո.  Երևանում մեկնարկում են ամերիկահայ մեծանուն գրող Վիլյամ Սարոյանի օրերը:

Սեպտեմբերի 5-11-ը Երևանը բառացիորեն կլցվի սարոյանական գույներով, որտեղ գրողի ստեղծագործության երկրպագուներին հնարավորություն կընձեռվի ծանոթանալ նրա մի շարք հազվագյուտ, ավելի վաղ չհրատարակված ստեղծագործություններին, նկարներին, դիտել սարոյանական մոտիվներով ոգեշնչված թատերական ներկայացումներ, մասնակցել նրա նոր պատմվածքների քննարկմանը և այլն:

Սույն նախաձեռնությունն իրականացվում է Հայաստանում ԱՄՆ դեսպանության և ՀՀ կրթության, գիտության, մշակույթի և սպորտի նախարարության աջակցությամբ: Հանրությանն առավել հետաքրքիր միջոցառումներից մեկը գրողի  նախկինում չցուցադրված "Սարոյանական գույներ. խոսքերից այն կողմ" 100 կտավների ցուցահանդեսը, տեղի կունենա սեպտեմբերի 5 - ին ՝ ժամը 11: 00-ին, Գրականության և արվեստի թանգարանում (տոմսերը կարելի է ձեռք բերել մուտքի մոտ): Նույն օրը ՝ ժամը 17:00 - ին, Երևանի թատրոնի և կինոյի պետական ինստիտուտում տեղի կունենա երեկո՝ նվիրված Սարոյանի կինո և թատերական ժառանգությանը (մուտքն ազատ է):

Սեպտեմբերի 6-ին ՝ ժամը 17:00-ին, Ազգային պատկերասրահում տեղի կունենա Վիլյամ Սարոյանի նախկինում չհրապարակված 22 պատմվածքների ժողովածուի շնորհանդեսը: Ժողովածուն կազմել է "Սարոյան" հիմնադրամի տնօրեն Սքոթ Սեդրակյանը: Գրքի հայերեն հրատարակությունն ապահովվել է "Անտարես" հոլդինգի կողմից:

Սեպտեմբերի 7-ին, ժամը 17:00-ին Ազգային պատկերասրահում Գրքի երևանյան փառատոնի փակման արարողության ժամանակ տեղի կունենա Վիլյամ Սարոյանի անվան կարճ պատմվածքների գրական մրցույթի հաղթողների պարգևատրում: Հաղթողը որպես մրցանակ կստանա Սարոյանի ինքնատիպ կտավներից մեկը (Մուտքն ազատ է):

Սեպտեմբերի 8-ին ՝ ժամը 14:00-ին, Ազգային գրադարանում տեղի կունենա քննարկում "Սարոյանի գրական և մշակութային ազդեցությունը և հայ հրատարակչությունները" թեմայով: Նույն օրը ՝ ժամը 19: 00-ին, Երևանի Հ. Մալյանի անվան թատրոնի և կինոյի պետական ինստիտուտում կցուցադրվի Սարոյանի "Գնացքներ" պատմվածքի մոտիվներով թատերական ներկայացում: Տոմսերը կարելի է ձեռք բերել մուտքի մոտ: Սեպտեմբերի 9 - ին ՝ ժամը 17:00-ին, տեղի կունենա Սարոյանի առաջին անգամ հրատարակված պատմվածքների ընթերցումների երեկոն և դրանց քննարկումը Հայաստանի Ամերիկյան համալսարանում:

Սեպտեմբերի 10-ին ՝ ժամը 18:30-ին, Հայկական բարեգործական ընդհանուր միության (ՀԲԸՄ) երևանյան գրասենյակում տեղի կունենա քննարկում "Սարոյանի ազդեցությունը հայ արվեստագետների նոր սերնդի գրականության, թատրոնի, կինոյի, վիզուալ արվեստի վրա" թեմայով:

"Սարոյանական օրերի" առիթով "Սարոյան" հիմնադրամի տնօրեն Սքոթ Սեդրակյանը նշել է. «Անսահման ուրախ ենք Հայաստան բերել այս նոր ուշագրավ նյութերը։ Այս հազվագյուտ գործերը ներկայացնելուց զատ մենք նաև ծրագրեր ենք մշակում, որով ցանկանում ենք նոր սերնդին մատուցել Սարոյանի համարձակ լավատեսությունն ու նրա մշտապես արդիական տեսլականը»: