Մեր ուղերձն աշխարհին. ՀՀ-ն Արցախի և Հայաստանի վերամիավորումն ուղենիշ հռչակած պետություն է. Արթուր Խաչատրյան

Արմինֆո.Հայոց պետականությունն Արցախի և Հայաստանի վերամիավորումն ուղենիշ հռչակած պետություն է։ Այդ մասին օգոստոսի 23-ին հայտարարել է ԱԺ ընդդիմադիր "Հայասատան" խմբակցության պատգամավոր Արթուր Խաչատրյանը՝ ՀՀ անկախության հռչակագրի ընդունման 34-րդ տարեդարձի կապակցությամբ Հայկական ԽՍՀ Գերագույն խորհրդի պատգամավորների կազմակերպած միջոցառման ժամանակ։

Խորհրդարանականի խոսքով՝ հայկական երկու պետությունները ՝ Հայաստանի Հանրապետությունը և Լեռնային Ղարաբաղի Հանրապետությունը հիմք են հանդիսացել ներկայիս Հայաստանի ստեղծման համար: Գործող իշխանությունը գլոբալիզացման ազդեցության տակ փորձում է սեպ խրել Հայաստանի, Արցախի և Սփյուռքի հայերի միջև։

Սակայն այսօր՝ Անկախության հռչակագրի ընդունման օրը, միջազգային հանրությանն ուղղված ուղերձը պետք է լինի հետևյալը.  հայ ժողովուրդն ունի համահայկական նպատակներ, ըստ որի, Հայաստանի Հանրապետությունը միտված է Հայաստանի և Արցախի Հանրապետությունների միավորման գաղափարի հռչակմանը, նշել է նա։

Ինչպես նշել է պատգամավորը, պետությունն ու պետականությունը շատ «թանկ հաճույք են»։ "Աշխարհի հազար ժողովուրդներից միայն մոտ 250 - ն ունեն  պետություն ունենալու "երջանկություն",  իսկ "քաղքենիական" հայտարարությունները՝ "դեռ ինչքան կարելի է պայքարել արևի տակ տեղ ունենալու համար", ընդամենը, ուղղված են պետականության կործանմանը", - նշել է նա: Մինչդեռ, պետությունը պահպանելու և պետություն ունենալու իր իրավունքը վերահաստատելու համար յուրաքանչյուրը պետք է պայքարի ամեն րոպե և ամեն վայրկյան, հավելել է Խաչատրյանը։

Նշենք, որ 1990թ. օգոստոսի 23-ին Հայկական ԽՍՀ Գերագույն խորհրդի ընդունած հռչակագիրը ոչ միայն հայ ժողովրդի ՝ իր անկախ պետությունը վերականգնելու դարավոր երազանքի արտահայտությունն էր, այլև Հայաստանի և Լեռնային Ղարաբաղի դե ֆակտո միավորումը իրավաբանորեն ձևակերպելու փորձ: Անկախության հռչակագիրը հիմնված էր Հայկական ԽՍՀ Գերագույն Խորհրդի և Լեռնային Ղարաբաղի Ազգային խորհրդի 1989 թվականի դեկտեմբերի 1-ի «Հայկական ԽՍՀ-ի և Լեռնային Ղարաբաղի վերամիավորման մասին» համատեղ որոշման վրա:

"Հայկական ԽՍՀ Գերագույն խորհուրդը՝ արտահայտելով Հայաստանի ժողովրդի միասնական կամքը, գիտակցելով իր պատասխանատվությունը հայ ժողովրդի ճակատագրի առջև համայն հայության իղձերի իրականացման և պատմական արդարության վերականգնման գործում, ելնելով մարդու իրավունքների համընդհանուր հռչակագրի սկզբունքներից և միջազգային իրավունքի հանրաճանաչ նորմերից, կենսագործելով ազգերի ազատ ինքնորոշման իրավունքը, հիմնվելով 1989 թվականի դեկտեմբերի 1-ի «Հայկական ԽՍՀ-ի և Լեռնային Ղարաբաղի վերամիավորման մասին» Հայկական ԽՍՀ Գերագույն խորհրդի և Լեռնային Ղարաբաղի Ազգային խորհրդի համատեղ որոշման վրա, զարգացնելով 1918 թվականի մայիսի 28-ին ստեղծված անկախ Հայաստանի Հանրապետության ժողովրդավարական ավանդույթները, խնդիր դնելով ժողովրդավարական, իրավական հասարակարգի ստեղծումը, ՀՌՉԱԿՈՒՄ Է անկախ պետականության հաստատման գործընթացի սկիզբը", - ասվում է Հայաստանի Հանրապետության անկախության հռչակագրում: Այն բաղկացած է 12 կետից ։ Հռչակագրի ընդունումից մոտ մեկ տարի անց՝ 1991 թվականի սեպտեմբերի 21-ին, Հայաստանում տեղի ունեցավ անկախության հանրաքվե, որի արդյունքում կազմավորվեց Հայաստանի երրորդ հանրապետությունը:

Այս համատեքստում հիշեցնենք, որ երբ դեռ ս. թ. սկզբին ՀՀ արդարադատության նախարարությունում վարչապետ Նիկոլ Փաշինյանը հայտարարեց, որ Հայաստանին պետք է նոր սահմանադրություն, որը ՀՀ-ն ավելի կենսունակ կդարձնի աշխարհաքաղաքական նոր պայմաններում, վարչապետի ընդդիմախոսները հայտարարեցին, որ նախաձեռնությունը բխում է Բաքվից, հիմնականում, նպատակ ունենալով ՀՀ սահմանադրությունից հանել Անկախության հռչակագրին հղումները, որտեղ հիշատակվում է Հայկական ԽՍՀ-ի և Լեռնային Ղարաբաղի վերամիավորման մասին որոշումը: Խնդրահարույց է համարվում նաև Անկախության հռչակագրի 11-րդ կետը, որտեղ ասվում է, որ Հայաստանի Հանրապետությունը սատար է կանգնում 1915 թվականին Օսմանյան Թուրքիայում և Արևմտյան Հայաստանում հայոց ցեղասպանության միջազգային ճանաչման գործին: