Հայաստանի ԱԳՆ ղեկավարը միջազգային հանրությանը կոչ է արել գործուն քայլեր ձեռնարկել Բերձորի միջանցքի ապաշրջափակման ուղղությամբ

Արմինֆո. Ֆրանսիայի արտգործնախարարի այցը Երևան անցնում է բարդ ժամանակներում, երբ մենք կանգնած ենք տարածաշրջանային անվտանգության լուրջ մարտահրավերների և սպառնալիքների առջև: Այդ մասին ապրիլի 28-ին հայտարարել է  ՀՀ ԱԳ նախարար Արարատ Միրզոյանը՝ Ֆրանսիայի իր գործընկեր Կատրին Կոլոնայի հետ համատեղ մամուլի ասուլիսի ժամանակ։

Նախարարը շնորհակալություն է հայտնել ֆրանսիական կողմին ՝ տարբեր մակարդակներով արտահայտված սկզբունքային դիրքորոշման համար՝ առկա խնդիրների, այդ թվում ՝ ՀՀ ինքնիշխան տարածքների նկատմամբ ադրբեջանական ագրեսիայի հետևանքների վերացման, ինչպես նաև Լեռնային Ղարաբաղի հակամարտության խաղաղ կարգավորման գործընթացի առաջմղման գործում ՝ որպես ԵԱՀԿ Մինսկի խմբի համանախագահ:

Միրզոյանը նշել է, որ հատուկ կարևորել է Ֆրանսիայի նախագահ Էմանուել Մակրոնի դերը Հարավային Կովկասում խաղաղության և կայունության հաստատման գործում։ "Հակառակ միջազգային հանրության քննադատությանը և Միջազգային դատարանի փետրվարի 22-ի որոշմանը, որն ունի պարտադիր բնույթ, Բերձորի/Լաչինի միջանցքի ավելի քան չորս ամիս շրջափակումից հետո Ադրբեջանն ապրիլի 23-ին, կոպտորեն խախտելով նոյեմբերի 9-ի եռակողմ հայտարարության 6-րդ կետը, արդեն պաշտոնապես շրջափակել է միջանցքը, քայլեր ձեռնարկելով ռուսական խաղաղապահ զորակազմի պատասխանատվության գոտում հսկիչ անցակետ տեղադրելու ուղղությամբ ։ Սա հերթական, սակայն շատ վտանգավոր հետևանքներով խախտում է", - ասել է Միրզոյանը՝ մատնանշելով Լեռնային Ղարաբաղում էթնիկ զտումների իրական սպառնալիքը։

Նրա խոսքով ՝ դա արդեն պետք է ակնհայտ լինի նաև միջազգային հանրության համար։ Միրզոյանի խոսքով ՝ այդ համատեքստում ինքը կոչ է արել ՄԱԿ-ի անվտանգության միջազգային մանդատով օժտված երկրներին գործուն քայլեր ձեռնարկել, այդ թվում ՝ Բերձորի միջանցք և Լեռնային Ղարաբաղ միջազգային առաքելություն ուղարկելու հրամայականը, ապահովել միջազգային մարդասիրական կազմակերպությունների անարգել անցումն Արցախ:

Միաժամանակ, նա ուշադրություն է հրավիրել այն փաստի վրա, որ հակառակ միջազգային հանրության կոչերին, Ադրբեջանը շարունակում է խախտել նոյեմբերի 9-ի եռակողմ հայտարարության այլ դրույթներ ևս, այդ թվում ՝ շարունակում է պահել հայ ռազմագերիներին և քաղաքացիական անձանց: "Չնայած Հայաստանի հանձնառությանը ՝ առկա խնդիրները խաղաղ ճանապարհով լուծել կառուցողական բանակցությունների միջոցով, Ադրբեջանը շարունակում է ՀՀ ինքնիշխան տարածքների օկուպացիան և ագրեսիվ գործողությունները, որոնք սադրիչ բնույթ են կրում և հակասում են Պրահայի և Սոչիի հանդիպումների արդյունքներով ընդունված հայտարարություններին", - ասել է Միրզոյանը ՝ հիշեցնելով այդ հայտարարություններում 1991թ.Ալմա-Աթայի հռչակագրի առանցքային դերակատարության մասին ։

Արարատ Միրզոյանն ընդգծել է տարածաշրջանում խաղաղության և կայունության հաստատման Հայաստանի հանձնառությունը։ Այդ համատեքստում նա մատնանշել է խաղաղության պայմանագրի նախագծի շուրջ Երեւանի եւ Բաքվի միջեւ բանակցությունների շարունակությունը։ "Համապարփակ խաղաղության հաստատման համար անհրաժեշտ է առկա բոլոր խնդիրների լուծում ՝ առանց ուժի սպառնալիքի կամ ուժի կիրառման, ապահովել Լեռնային Ղարաբաղի ժողովրդի իրավունքներն ու անվտանգությունը միջազգայնորեն երաշխավորված երկխոսության շրջանակներում: Մենք ակնկալում ենք Ֆրանսիայի անկեղծ ջանքերն ու ներգրավվածությունը վերոնշյալ գործընթացներում", - ամփոփել է Միրզոյանը ։