Հայաստանի արտգործնախարար. Իսրայելը պետք է դադարեցնի այդ մահաբեր զենքի  բիզնեսն Ադրբեջանի հետ

Արմինֆո.Ադրբեջանին վաճառվող իսրայելական զենքն օգտագործվում է Հայաստանի քաղաքացիական ենթակառուցվածքի դեմ, և  երկրների միջև զենքի վաճառքը պետք է անհապաղ դադարեցվի: Այդ մասին հայտարարել է Հայաստանի արտգործնախարար Զոհրաբ Մնացականյանը The Jerusalem Post-ին տված հարցազրույցում:

Ընդ որում, Հայաստանի արտաքին քաղաքական գերատեսչության ղեկավարն արձանագրել է, որ չնայած հայ-իսրայելական հարաբերությունները վերջին տարիները բարելավվել են,  Իսրայելի կողմից Ադրբեջանին ժամանակակից սպառազինությունների շարունակական մատակարարումները մնում են չլուծված խնդիր երկրների համար։

"Ադրբեջանին զենքի վաճառքը մահացու վտանգավոր է, քանի որ Ադրբեջանը երբեք չի տատանվում այդ զենքն օգտագործել քաղաքացիական ենթակառուցվածքի, քաղաքացիական բնակչության դեմ։ Մենք հետևողականորեն զբաղվելու ենք այս հարցով, այն միշտ լինելու է մեր օրակարգի անբաժանելի մասը ինչպես երկկողմ, այնպես էլ բազմակողմ հարթակներում։ Իսրայելը պետք է դադարեցնի Ադրբեջանի հետ այդ մահաբբեր բիզնեսը", - ընդգծել է Մնացականյանը։

Ընդ որում, ՀՀ ԱԳՆ ղեկավարը հիշեցրել է, որ էսկալացիայի նախօրեին (հուլիսի 12 - խմբ.) Ադրբեջանը ռազմաքաղաքական բարձրագույն ղեկավարության մակարդակով հետեւողականորեն հանդես է եկել ռազմատենչ հռետորաբանությամբ, Հայաստանի նկատմամբ տարածքային եւ պատմական պահանջներ է հնչեցրել՝ միջազգային միջնորդ ԵԱՀԿ Մինսկի խմբի աշխատանքից դժգոհություն հնչեցնելով:

Մնացականյանը հավելել է, որ սա Լեռնային Ղարաբաղի շուրջ հակամարտությունը "բացառապես իրենց պայմաններով" կարգավորելու Ադրբեջանի երկրորդ փորձն է, սակայն "Ադրբեջանի կողմից ուժի ցուցադրումը եւ նրա ենթադրյալ ռազմական առավելությունը տապալվեցին, եւ մենք ականատես եղանք լուրջ վրիպումների":

Ադրբեջանի կողմից շահագործվող մի քանի իսրայելական անօդաչու թռչող սարքերի ոչնչացման մասին հստակեցմանն ի պատասխան՝ ՀՀ ԱԳՆ ղեկավարն ընդգծել է, որ Հայաստանը հակազդել է Ադրբեջանի գործողություններին՝ ուշադրություն չդարձնելով զենքի ծագման երկրի վրա։

"Մեզ համար այդ զենքը մահացու վտանգավոր է, քանի որ այն սպանում է մեր ժողովրդին ։ Մեր զինվորականները վնասազերծել են ադրբեջանական զենքը՝ անկախ դրա ենթադրյալ ծագումից։ Ադրբեջանի ստացած եւ Հայաստանի ու Լեռնային Ղարաբաղի քաղաքացիական ենթակառուցվածքների եւ բնակչության դեմ եւ կիրառած զենքի ծագման մասին փաստերը բազմաթիվ են, եւ հուլիսյան իրադարձությունները դրանց լրացուցիչ ապացույցն են", - ասել է Մնացականյանը։

Ընդ որում, նա ընդգծել է, որ չնայած վերջին էսկալացիային, Հայաստանը պատրաստ է վերսկսել 1994 թվականի հրադադարի ռեժիմը: "Ի տարբերություն Ադրբեջանի, Հայաստանը համաձայնել է հրադադարի ռեժիմի ամրապնդման միջազգային միջնորդների բոլոր առաջարկություններին ՝ տեղերում ավելի շատ դիտորդներ տեղակայելու և հրադադարի խախտումների հետաքննության մեխանիզմներ ներդնելու միջոցով։ Հայաստանը շարունակում է հանդես գալ էսկալացիայի ռիսկի նվազեցման այս եւ այլ միջոցների ներդրման օգտին", - ասել է Հայաստանի գլխավոր դիվանագետը:

Անդրադառնալով Հայոց ցեղասպանությունը ճանաչելու Իսրայելի համառ մերժմանը ' Հայաստանի ԱԳՆ ղեկավարը փաստել է, որ Հոլոքոսթի սարսափը վերապրած ժողովրդի կողմից Հայոց ցեղասպանության ճանաչումը բարոյականության հարց է: "Դա ձեր խղճի վրա է։ Ես գիտեմ, որ շատ հրեաներ՝ հասարակական գործիչներ, մտավորականներ և հասարակ մարդիկ, հաստատակամորեն կիսում են այդ տեսակետը։ Սակայն Իսրայելի իշխանությունները կամ պետք է ճանաչեն Հայոց ցեղասպանությունը կամ ձեռնպահ մնան այդ քայլից ։ Դա վերաբերում է ոչ միայն Հայաստանին, այլեւ Իսրայելին", - ամփոփել է նախարարը։

Աղբյուրը նաև նշում է, որ Ադրբեջանը Իսրայելի հայտնի մերձավոր դաշնակիցն է: Ադրբեջանը բավարարում է Իսրայելի նավթային կարիքների մոտ 40 տոկոսը։ Ադրբեջանը իսրայելական պաշտպանական ձեռնարկությունների վաղեմի և մշտական հաճախորդն է։ 2016 թվականին Ադրբեջանի նախագահ Իլհամ Ալիեւը հաղորդել էր, որ իր երկիրը 5 մլրդ դոլարի երկարաժամկետ պայմանագրեր է ստորագրել Իսրայելից զենք եւ անվտանգության միջոցներ ձեռք բերելու համար:

Հարկ է նշել, որ հայ-ադրբեջանական պետական սահմանին վերջին սրման ընթացքում Հայաստանի զինված ուժերը ոչնչացրել են Ադրբեջանի կողմից կիրառվող մեկ տասնյակից ավելի իսրայելական անօդաչու թռչող սարքեր, այդ թվում՝ թանկարժեք Elbit Hermes 900 հետախուզական ԱԹՍ: