ՀՀ-ում Բուլղարիայի դեսպան. Բուլղարական կինեմատոգրաֆը գնալով ավելի լայն ճանաչում է ստանում Հայաստանում

Արմինֆո. Նոյեմբերի 17-ից Հայաստանում մեկնարկել է Եվրոպական կինոյի շաբաթը, որի շրջանակում հայ հանդիսատեսին հնարավորություն է ընձեռվել ծանոթանալ եվրոպական կինեմատոգրաֆի վերջին 11 ֆիլմերին, որոնք բարձր գնահատականների են արժանացել Եվրոպայի տարբեր կինոփառատոններում: «Մոսկվա՚ կինոթատրոնում ներկայացվել է բուլղարացի ռեժիսոր Կոնստանտին Բոժանովի «Եվ հետո կլինի լույս՚ ֆիլմը, որն ուղեկցվել է լիակատար անշլագով:

Հանդիսատեսի առջև ողջույնի խոսքով հանդես է եկել Հայաստանում Բուլղարիայի արտակարգ և լիազոր դեսպան Մարիա Պավլովա Ցոցորկովա-Կայմատչիևան: Նա նշել է, որ Հայաստանում փառատոնն ընթանում է Եվրոպական մշակութային ժառանգության տարվա շրջանակում: Դեսպանը երախտիքի խոսք է ասել Հայաստանում ԵՄ պատվիրակությանն ու Բրիտանական խորհրդին, որոնք հայ հանդիսատեսին հնարավորություն են ընձեռել դիտելու եվրոպական կինոյի նորույթները: Դեսպանի հավաստամբ, բուլղարական կինեմատոգրաֆը գնալով ավելի լայն ճանաչում է ձեռք բերում Հայաստանում: Այդ առնչությամբ նա հիշեցրել է, որ 2017 թվականին բուլղարացի ռեժիսոր Իգլիկա Տրիֆոնովայի «Դատախազ, պաշտպան հայրն ու նրա որդին՚ ֆիլմն ժյուրիի մրցանակի է արժանացել է «Ոսկե ծիրան՚ կինոփառատոնում: Շնորհակալություն հայտնելով Կոնստանտին Բոժանովին, որը համաձայնել է անձամբ ժամանել Հայաստան և ներկայացնել իր ֆիլմը, դեսպանն ընդգծել է, որ «Եվ հետո կլինի լույս՚ ֆիլմում արտացոլված է եվրոպական ժառանգության արժեհամակարգը:

Ռեժիսոր Կ.Բոժանովը պատմել է, որ իր ֆիլմի գլխավոր հերոսը տառապում է աուտիզմով և մշտապես հայտնվում է իրավիճակներում, երբ պետք է որոշումներ կայացնի և ընտրություն կատարի: Ռեժիսորը կարծում է, որ իրականում դա այն է, ինչին բախվում է մեզանից յուրաքանչյուրը: Նշելով, որ սա իր առաջին այցն է Հայաստան, բուլղարացի ռեժիսորը հայ հանդիսատեսին երախտագիտություն է հայտնել իր ֆիլմի նկատմամբ  հետաքրքրության համար: «Ես Հայաստանում եմ մի քանի ժամ, բայց արդեն հիանալի գիտակցում եմ, որ ինձ հետ կտանեմ ինչ-որ արժեքավոր բան: Այսօր ինձ վիճակվեց այցելել Սերգեյ Փարաջանովվի թանգարան և ծանոթանալ նրա հետ` ինչպես արվեստաբանի: Ես գիտեի նրա մշակութային ժառանգության մասին` որպես ռեժիսոր, ծանոթ եմ նրա ֆիլմերին, սակայն այսօր առաջին անգամ տեսա ռեժիսորի ստեղծած կոլաժները: Եվ ես հասկացա, որ ողջ աշխարհը պետք է ճանաչի Սերգեյ Փարաջանովին` որպես նկարիչ- կոլաժիստ: Շնորհակալություն, որ Դուք այսօր դա ինձ պարգևեցիք՚, - եզրափակել է բուլղարացի ռեժիսորը:

Հավելենք, որ նախօրեին  Կոնստանտին Բոժանովը վարպետության դաս է վարել Երևանի թատրոնի և կինոյի պետական ինստիտուտի ուսանողների համար: Բուլղարացի ռեժիսորը հայ ուսանողների հետ հանդիպմանն ընդգծել է, որ ֆիլմ ստեղծելիս անհրաժեշտ է հստակ իմանալ, թե որ լսարանի համար է նախատեսված աշխատանքը, և որն է ֆիլմի գլխավոր ուղերձը, որի գիծը հարկավոր է պահպանել մինչև վերջ: «Սակայն առավել նշանակալին ձեր ներքին զգացողությունն է: Ձեր աշխատանքներում դուք պետք է դուրս գաք ձեզ համար սովորական շրջանակներից և ցույց տաք այն, ինչ զգում եք՚, - խորհուրդ է տվել բուլղարացի ռեժիսորը` հայտնելով առավելագույն բաց և ակտիվ երկխոսության պատրաստակամություն:

ԱրմԻնֆո-ի թղթակցի հետ զրույցում Բոժանովը նշել է, որ վարպետության դասի ընթացքում ակնկալում էր, որ ուսանողներն ավելի անկեղծ կլինեն ֆիլմերի դրվագների նկատմամբ, որոնք ռեժիսորը որոշել էր նրանց ներկայացնել: «Ցավոք սրտի` մի քիչ այլ կերպ ստացվեց: Սակայն, համոզված եմ, որ եթե մեզ վիճակկվի կրկին հանդիպել, շփվել և կրկին ներկայացնել այն ֆիլմերը, որոնք ընտրել էի նրանց համար այսօր, նրանք կընկալեն ու կընդունեն: Ի վերջո, սրանք այն ֆիլմերն են, որոնք զգալի հետք են թողել կինեմատոգրաֆի պատմության մեջ՚, - նշել է բուլղարացի ռեժիսորը:

Վարպետության դասի անցկացմանն աջակցել են ինստիտուտի ուսխորհրդի նախագահ Միլեն Բալդրյանը, միջազգային բաժնի պետ Զառա Սահակյանը և պրոռեկտոր Արմինե Եղիազարյանը: