«ԱՅԲ» դպրոցի սաներն ամռանը պրակտիկա կանցնեն «Ռոստելեկոմի» գրասենյակում

Արմինֆո.Հունիսի 30-ին «Ռոստելեկոմ»-ի թիմը մասնակցեց «Այբ» դպրոցի կազմակերպած՝ «Սովորում ենք աշխատելով» (Ayb Internship Fair) միջոցառմանը՝ նվիրված դպրոցականների մասնագիտական կողմնորոշմանն ու ընկերությունների գործունեության մասին իրազեկմանը։

Ինչպես ԱրմԻնֆո-ին հաղորդեցին ընկերության մամուլի ծառայությունից, միջոցառման մեկնարկին մասնակից ընկերությունների մասնագետների կողմից քննարկում-դասընթացներ անցկացվեցին երեխաներին հետաքրքրող թեմաների շուրջ։

«Ռոստելեկոմ»-ի ՏՏ անվտանգության մասնագետի հետ երեխաները ծանոթացան հասարակական վայրերում ինտերնետից օգտվելիս առկա հնարավորություններին ու վտանգներին, որոնց մասին անգամ շատերը պատկերացում չունեին։ Երեխաների խոսքով՝ իրենք անգամ չէին էլ պատկերացնում, թե կազմակերպված հանդիպումը որքան կարևոր է լինելու իրենց համար և որքան գործնական տեղեկատվություն ու հմտություններ են ստանալու։

Միջոցառման մասնակից կառույցների թվում էին տարբեր ոլորտներ ներկայացնող ընկերություններ՝ «ՋԻԷՆՍԻ-ԱԼՖԱ» ՓԲԸ (Ռոստելեկոմ Հայաստան), Կոնվերս Բանկ ՓԲԸ-ն, Habitat Armenia-ն, Ալերգոլոգիայի և իմունոլոգիայի կենտրոնը, Menu.am-ը, ՀՀ ԳԱԱ Մոլեկուլային կենսաբանության ինստիտուտը, Զանգակ հրատարակչությունը, այլ ընկերություններ։

Դասընթացների ավարտին երեխաները հնարավորություն ունեցան հանդիպելու բոլոր հրավիրված կառույցների ներկայացուցիչների հետ, զրուցելու առավել հետաքրքրող հարցերի շուրջ և ամենակարևորը՝ թողնելու իրենց ռեզյումեները ընկերություններում առաջիկա արձակուրդների ընթացքում աշխատանքային պրակտիկա անցնելու նպատակով։

«Ռոստելեկոմ»-ի հայաստանյան գրասենյակում պրակտիկա կանցնեն ընտրական փուլն անցած երեխաները, ովքեր կծանոթանան ընկերության տարբեր ստորաբաժանումների աշխատանքներին ու գործառույթներին։

«Ռոստելեկոմ»-ի կողմից հաճախ են իրականացվում երիտասարդական ամենատարբեր նախաձեռնություններ, որոնք ուղղված են ուսանողների և դպրոցահասակների շրջանում կորպորատիվ մշակույթի, համացանցից օգտվելու և այլ կարևոր հարցերի շուրջ տեղեկատվության տարածմանն ու իրազեկվածության բարձրացմանը՝ ի նպաստ ապագա բանիմաց մասնագետների ձևավորման ու կայացման։

2012թ. դեկտեմբերից ՀՀ-ում հեռահաղորդակցության ոլորտի առաջատար օպերատորներից մեկը՝ՋԻԷՆՍԻ-ԱԼՖԱ ՓԲԸ-ն հաջողությամբ մատուցում է ինտերնետ հասանելիության և ֆիքսված հեռախոսակապի ծառայություններ Rostelecom ապրանքանիշի ներքո: 2013թ. սեպտեմբեր ամսից ընկերությունը «ՀԻԲՐԻԴ ՍՈԼՅՈՒՇՆԶ» ընկերության հետ համատեղ մատուցում է նոր սերնդի Այփի հեռուստատեսության ծառայությունը ևս:

«Ռոստելեկոմ»-ի ցանցը Հայաստանում կառուցված  է օպտիկա-մանրաթելային մալուխով, որի երկարությունը կազմում է ավելի քան 3000 կմ` ծածկելով ՀՀ տարածքի 80%-ը:

Իրանի և Վրաստանի օպերատորների միջոցով «Ռոստելեկոմ»-ի ցանցը փոխկապակցված  է տարածաշրջանի հիմնական մայրուղային ցանցերի և տրաֆիկի փոխանակման խոշորագույն կենտրոնների հետ:

Ընկերության կորպորատիվ հաճախորդների ցանկում են խոշորագույն ձեռնարկություններ ու բանկեր, ՀՀ կառավարությունը և պետական մարմիններ, հեռահաղորդակցության ընկերություններ և միջազգային կազմակերպություններ:

Գերժամանակակից տեխնոլոգիաների կիրառումը ընկերությանը հնարավորություն է տալիս լիովին բավարարել ժամանակակից բաժանորդի կարիքները՝ տարածվելով և ծառայությունների հասանելիությունն ապահովելով ՀՀ ողջ տարածքով:

2014թ.-ից ընկերությունը բնակչությանը ծառայություններ է մատուցում Երևան քաղաքի Կենտրոն, Էրեբունի, Նուբարաշեն, Աջափնյակ, Դավիթաշեն, Մալաթիա-Սեբաստիա, Նոր Նորք և Ավան, Արաբկիր վարչական շրջաններում և Աբովյան, Չարենցավան, Հրազդան, Վանաձոր, Գյումրի, Աշտարակ, Մեծամոր, Արմավիր, Մասիս, Արտաշատ, Արարատ, Սևան, Դիլիջան, Իջևան, Կապան, Մարտունի, Ալավերդի և Քաջարան քաղաքներում: Նշված բոլոր քաղաքներում գործում են վաճառքի և սպասարկման սրահներ, ինչպես նաև  վաճառակետեր:

«Ռոստելեկոմ» ԲԲԸ-ն (www.rostelecom.ru)  Ռուսաստանի և Եվրոպայի հեռահաղորդակցության ոլորտի խոշորագույն և դինամիկ զարգացող ընկերությունների խումբ է, որը ծառայություններ է մատուցում ոլորտի բոլոր սեգմենտներում Ռուսաստանի ողջ տարածքով:

Ընկերությունը առաջատար դիրք է գրավում ինտերնետի հասանելիության և վճարովի հեռուստատեսության ծառայությունների ռուսաստանյան շուկայում. Ինտերնետ հասանելիության ծառայությունից օգտվողների թիվը գերազանցում է 10.9 մլն-ը, իսկ վճարովի հեռուստատեսությանը՝ 7.7 մլն-ը:

«Ռոստելեկոմ» ԲԲԸ-ն առաջատարն է ռուսաստանյան պետական կառույցների  և բոլոր մակարդակների կորպորատիվ հաճախորդներին մատուցվող հեռահաղորդակցության ծառայությունների շուկայում:

Ընկերությունը առաջատար դիրքեր ունի նաև Էլեկտրոնային կառավարության համար ինովացիոն լուծումների, ամպային տեխնոլոգիաների կիրառման, առողջապահության, կրթության, անվտանգության, կենցաղ-կոմունալ ծառայությունների ոլորտներում:

Ընկերության կայուն ֆինանսական վիճակը հաստատվում է վարկանիշային աղյուսակներում գրաված դիրքերով՝  Fitch Ratings գործակալությունն այն գնահատում է վարկանիշային աղյուսակի "BBB-" մակարդակում, իսկ Standard&Poor’s գնահատմամբ այն "BB+" է: