Փորձագետ. հայ ժողովրդի իրավունքներից հրաժարումը հանգեցրեց Ադրբեջանի կողմից Հայաստանի դեմ ուղղված օկուպացիոն ծրագրերի առաջմղմանը

Արմինֆո. Հայ ժողովրդի իրավունքներից հրաժարումը հանգեցրեց Ադրբեջանի կողմից Հայաստանի դեմ ուղղված օկուպացիոն ծրագրերի առաջմղմանը, և դա անհերքելի փաստ է։ Այս մասին գրում է ադրբեջանագետ Տաթևիկ Հայրապետյանը։

Որպես օրինակ նա բերել է Ադրբեջանի Միլլի Մեջլիսի փոխնախագահ Զիյաֆեթ Ասկերովի ելույթից մի մեջբերում, ով պնդում է, թե «Արևմտյան Ադրբեջանի համայնքի գլխավոր նպատակն է Արևմտյան Ադրբեջանի մասին ճշմարտությունը հասցնել միջազգային հանրությանը»։ «Մեր գլխավոր նպատակն է պաշտպանել այդ հողերից տեղահանված մեր հայրենակիցների իրավունքները և ապահովել նրանց խաղաղ վերադարձը հայրենիք։ Համայնքի ղեկավարությունն ակտիվորեն աշխատում է այս ուղղությամբ միջազգային ֆորումներում, ներառյալ ՄԱԿ-ը։ Յուրաքանչյուր արևմտյան ադրբեջանցի իրավունք ունի վերադառնալ իր նախնիների հողը, և դա նրա օրինական, պատմական ու բարոյական իրավունքն է։ Որովհետև այդ հողերը մեր նախնիների տարածքներն են»,- հայտարարել է Ասկերովը։

Այս կապակցությամբ Հայրապետյանը հորդորում է ուշադիր վերընթերցել այս հայտարարությունը, որտեղ ուղղակիորեն ասվում է, թե Հայաստանը «իրենց նախնիների հողն է»։ «Նա դա անում է առանց որևէ փաստի, պատմական կամ աշխարհագրական հիմնավորման։ Ավելին, երբ նրանք այս հարցով դիմեցին միջազգային դատարան, դատարանն իրենց ասաց՝ «շարունակեք ձեր աշխատանքը» (Արման Թաթոյանն այս մասին փաստերով խոսում էր հեռուստաալիքի բանավեճի ժամանակ), բայց նրանք հանձնվողը չեն, նրանք զրոյից օկուպացիոն հայեցակարգ են ստեղծել և ավելի քան երեք տարի ռեսուրսներ են ներդնում դրա տարածման համար, այնինչ իրենց հպատակված հայաստանյան իշխանությունները զուգահեռաբար իրականում ամեն կերպ փորձում են թաղել Արցախի ժողովրդի բոլոր իրավունքները, անգամ միջազգային կազմակերպությունների կողմից հաստատվածները։ Դրանից հետո նրանք կեղծ խոսակցություններ են հնարում, թե եթե մենք չխոսենք Արցախի մասին, նրանք մի կողմ կդնեն իրենց օկուպացիոն նկրտումները, բայց իրականում հենց մեր իրավունքներից հրաժարվելն է հանգեցրել մեր դեմ ուղղված օկուպացիոն ծրագրերի առաջմղմանը, և դա անհերքելի փաստ է»,- նշել է փորձագետը։