Ուժայինները խուզարկություններ են իրականացնում Armat Media-ի խմբագրությունում

Արմինֆո. Ուժայինները խուզարկություններ են իրականացնում Armat Media լրատվական գործակալության խմբագրությունում։ Ըստ լրատվամիջոցների՝ գործակալությունը փոխկապակցված է "Ուժեղ Հայաստան" կուսակցության առաջնորդ Սամվել Կարապետյանի թիմի հետ և պատկանում է կուսակցության անդամ Ալիկ Ալեքսանյանին:

Ինչպես լրագրողների հետ զրույցում հաղորդել է գործակալության խմբագիր Նելլի Ավետիսյանը, ուժայինները տարել են իրենց մոնտաժողների համակարգիչները, որտեղ, նրա խոսքով, պահվում էին նկարահանումների տեսագրությունները: "Ստացվում է, որ խմբագրությունն այլևս արխիվ չունի իր աշխատանքն իրականացնելու համար։ Նրանք ապամոնտաժել են համակարգիչները, առգրավել հիշողության քարտերը", - պատմել է Ավետիսյանը։

Նա պարզաբանել է, որ համակարգիչները պարունակում էին նյութեր և հետազոտություններ "300 000 ադրբեջանցիների Հայաստան տեղափոխվելու" ռիսկի վերաբերյալ: Այդ առնչությամբ նա համոզմունք է հայտնել, որ խուզարկություններն իրականացվել են, որպեսզի իրենք չկարողանան այդ տեղեկությունը ներկայացնել հանրությանը։ "Դրա համար էլ նրանց հենց համակարգիչներ էին պետք։ Սա նրա համար է արվում, որ մենք չկարողանանք հրապարակել նյութեր, որոնք կապված են հայ ժողովրդի ապագայի հետ, և որոնք կարող էին քաղաքական մեծ ազդեցություն ունենալ։ Այնտեղ մնացել են դեռևս չհրապարակված տեղեկություններ, պատրաստի ռեպորտաժներ, որոնք ուրիշ ոչ մի տեղ չկան, բացի այդ համակարգիչներից։ Ստացվում է, որ դրանք այն ռեպորտաժներն ու նյութերն են, որոնք մենք հիմա չենք կարող ցուցադրել", - հաղորդել է խմբագիրը։

Ավետիսյանը նշել է, որ այդ ռեպորտաժները Հայաստանի քաղաքացիները պետք է տեսնեին մինչև 2026 թվականի հունիսի 7-ի խորհրդարանական ընտրությունները։ Նա ուշադրություն է հրավիրել այն հանգամանքին, որ խուզարկությունները հաջորդել են Հանրային հեռուստատեսությունում տեղի ունեցած բանավեճին (որի ընթացքում կուսակցության քաղխորհրդի անդամ Նարեկ Կարապետյանը կրկին բարձրացրել է Հայաստանում ադրբեջանցիների վերաբնակեցման ռիսկի թեման-խմբ.) "Մենք կարծում էինք, որ այդ կարմիր գիծը նրանք չէին անցնի։ Սա գործող իշխանության պայքար է ազատ լրատվամիջոցների, խոսքի ազատության դեմ", - հայտարարել է Ավետիսյանը։

Մյուս խմբագիր Աղավնի Սուքիասյանն, իր հերթին, հաղորդել է, որ խուզարկություններն իրականացնում են Հայաստանի Քննչական կոմիտեի և Ազգային անվտանգության ծառայության ներկայացուցիչները: Նա ուշադրություն է հրավիրել այն հանգամանքին,  որ տեղում ոչ մի փաստաբան չկա, խուզարկությունների շրջանակներում առգրավվել են նաև խմբագրության աշխատակիցների հեռախոսները։ "Դա ամբողջովին խաթարել է մեր աշխատանքը։ Նրանք տարել են 2 համակարգիչ և առգրավել բոլոր հեռախոսները։ Շատ աշխատակիցներ տվել են իրենց գաղտնաբառերը, որպեսզի իրենց հեռախոսները ուսումնասիրվեն տեղում: Բայց, նույնիսկ, նրանց չեն վերադարձրել", - ասել է Սուքիասյանը, հավելելով, որ դատարանը թույլ է տվել խուզարկություններ իրականացնել կուսակցության անդամ Ալիկ Ալեքսանյանի գործով։

Իրավիճակին արձագանքել է նաև "Ուժեղ Հայաստան" կուսակցության մամուլի խոսնակ Մարիաննա Ղահրամանյանը: Նա հայտարարել է, որ այն, ինչ կատարվում է այս րոպեներին Armat Media-ում, ՀՀ վարչապետ Նիկոլ Փաշինյանի վախի դրսևորումն է: "Փաշինյանը երեկ տանուլ է տվել հանրային բանավեճը, իսկ հիմա գրոհել Է ԶԼՄ-ների վրա։ Սա ոտնձգություն է խոսքի ազատության դեմ, բայց այս ամենի վերջը կգա 2 օրից", - Facebook-ի իր էջում գրել է Ղահրամանյանը։ Հիշեցնենք, որ Ալեքսանյանը իրավապահների կողմից ձերբակալվել էր հունիսի 2-ին: Քննչական կոմիտեից հաղորդել են, որ նա անցնում է հավաքներին մասնակցելու համար քաղաքացիներին նյութական խրախուսման և առանձնապես խոշոր չափերով փողերի լվացման գործով։ Հաղորդվում է, որ հետաքննության ընթացքում ուժայինները հարցաքննել են մոտ 500 մարդու: Քննությունը պնդում է, որ 2025 թվականի սեպտեմբերից մինչև 2026 թվականի մայիս ամիսն Ալեքսանյանը, հանդիսանալով "Մեր ձեւով" հասարակական կազմակերպության ղեկավար, շուրջ 1400 քաղաքացու աշխատանքի է տեղավորել կազմակերպության տարբեր գրասենյակներում ՝ Հայաստանի ողջ տարածքում, որոնց մի մասը միաժամանակ աշխատել է այլ ընկերություններում, իսկ հետո աշխատակիցների մի մասն ազատվել է աշխատանքից ՝ այդպես էլ չիրականացնելով կազմակերպության նպատակները: