Սաղաթելյան. Հակակոռուպցիոն կոմիտեն խուզարկություններ է կատարել "Հայաստան" դաշինքի նախընտրական շտաբներում և ՀՅԴ ԳՄ նախագահի բնակարանում

Արմինֆո. Հայաստանի Հակակոռուպցիոն կոմիտեն խուզարկություններ է կատարել "Հայաստան" դաշինքի նախընտրական շտաբներում, մասնավորապես, Աշտարակում, ինչպես նաև ՀՅԴ Գերագույն մարմնի նախագահ Աշոտ Սիմոնյանի բնակարանում: Այդ մասին Facebook-ի իր էջում հաղորդել է ՀՅԴ Գերագույն մարմնի ներկայացուցիչ, "Հայաստան" դաշինքի պատգամավոր Իշխան Սաղաթելյանը:

Պատգամավորը համոզմունք է հայտնել, որ նման գործողություններով փորձ է արվում սահմանափակել և խոչընդոտել ընդդիմադիր ուժերի նախընտրական շտաբների գործունեությունը, ինչպես նաև ճնշում գործադրել քաղաքական ուժի կողմնակիցների և ընտրողների վրա: "Բայց ոչինչ չի ստացվի։ ՀՀ վարչապետ Նիկոլ Փաշինյան, դու և քեզ սպասարկող իրավական համակարգը վաղուց կանխատեսելի են, - հայտարարել է Սաղաթելյանը:

Ընդդիմադիրը կարծում է, որ այդ բոլոր գործողությունները պայմանավորված են իշխանությունը կորցնելու վախով։ Նա միջազգային դիտորդներին կոչ է արել ուշադրություն դարձնել տեղի ունեցողին և համապատասխան գնահատական տալ: "Իսկ մեր համակիրներին և հայ ժողովրդին ուզում եմ հավաստիացնել, որ նման մեթոդներով նրանք չեն կարող ապահովել իրենց իշխանության վերարտադրությունը։ Ուստի, կոչ եմ անում շարունակել ձեր աշխատանքը, ուշադրություն չդարձնել տեղի ունեցողին, և ընդամենը 4-5 օրից այս իշխանության վերջը կգա (հունիսի 7 - ի խորհրդարանական ընտրությունները-խմբ.)", - եզրափակել է Սաղաթելյանը ։