TRIPP-ը լուրջ սրբագրումների կարիք ունի, քանի որ այսօր այն վերածվել է Հայաստանում ԱՄՆ-ի նախագծի՝ բացառապես ի շահ Թուրքիայի և Ադրբեջանի. Ռոբերտ Քոչարյան

Արմինֆո. TRIPP-ը ԱՄՆ-ի նախագիծն է Հայաստանում՝ ի շահ Թուրքիայի և Ադրբեջանի շահերի։ Մեղրիում հարցազրույցի ժամանակ նման գնահատականներ է հնչեցրել ՀՀ երկրորդ նախագահ, "Հայաստան" դաշինքի վարչապետի թեկնածու Ռոբերտ Քոչարյանը:

Նշելով, որ այդ նախագիծը Հայաստանին գրեթե ոչինչ չի տալիս, նա արձանագրել է, որ փաստաթղթում բացակայում է որևէ երաշխիք, որ երկաթուղին կհասնի մինչեւ Երասխ: Երկրորդ նախագահն այդ առումով ուշադրություն է հրավիրել այն հանգամանքի վրա, որ այդ ծրագրում Հայաստանի մասնաբաժինը կազմում է ընդամենը 26 տոկոս։ "43 կիլոմետրանոց հատվածից 26 տոկոս տարանցիկ մուտքերը անլուրջ գումար են", - ընդգծել է քաղաքական գործիչը: Նա ներկայացրել է իր մոտեցումը, որը թույլ կտա Հայաստանին ինչ-որ շահաբաժիններ ունենալ նախագծից։ Մասնավորապես, Քոչարյանը նշել է, որ TRIPP նախագիծը պետք է մասշտաբայնորեն մեծացնել ՝ երկաթուղային հաղորդակցությունը հասցնել մինչեւ Երասխ (ավան՝ Նախիջևանի հետ Հայաստանի սահմանին - խմբ.):

Աշխարհաքաղաքական տեսանկյունից անհրաժեշտ է ընդլայնել TRIPP-ում նաև Իրանի վստահությունը վայելող այլ պետությունների ներկայությունը։ Հակառակ դեպքում Հայաստանը Թեհրանի հետ հարաբերություններում լուրջ խնդիրների առաջ կկանգնի։

Ընդգծելով, որ ԱՄՆ-ն այսօր, փաստորեն, պատերազմի մեջ է Իրանի հետ, Քոչարյանը մատնանշել է երաշխիքների բացակայությունը, որ Թեհրանը չի փակի Հայաստանի հետ սահմանը՝ տարածաշրջանում ԱՄՆ ներկայության ի հայտ գալուց հետո: Որպես փաստարկ նա նշել է, որ Իրանի արտաքին առևտրում Հայաստանի մասնաբաժինը կազմում է ընդամենը 0,2 - 0,3 տոկոս: Նրա խոսքով՝ հայ-իրանական սահմանի հնարավոր փակումը Իրանը, գործնականում, չի զգա, մինչդեռ, Հայաստանի համար այդ սահմանը ռազմավարական նշանակություն ունի, բայց ոչ միայն երկկողմ առեւտրի տեսանկյունից, այլ նաեւ որպես ելք դեպի Հնդկական օվկիանոս և ԱՄԷ-ի հետ առևտրի զարգացման ճանապարհ, որի չափերը վերջին տարիներին զգալիորեն աճել են։

"Դա վտանգի տակ դնել՝ հանուն տարանցման համար 43 կմ հատվածի՞։ Կներեք, բայց դա շատ դժվար է համարել խելամիտ որոշում", - ընդգծել է երկրորդ նախագահը՝ «Հայաստան» դաշինքի առաջնորը:

Նա ընդգծել է, որ նախքան TRIPP նախագծի մեկնարկի մասին որոշումը պետք էր բանակցել Իրանի հետ, հասկանալ, թե որոնք են նրանց անհանգստության պատճառները, և ինչ հետևանքներ դա կունենա: Քոչարյանը հայտարարել է, որ Իրանի նոր ղեկավարությունն ավելի կոշտ է տրամադրված սեփական շահերի պաշտպանության հարցում։ Քաղաքական գործիչը որպես օրինակ նշել է ԱՄՆ-ի հետ պատերազմում իր շահերը պաշտպանելու Իրանի ռազմավարությունը, որտեղ նա օգտագործել է մեթոդներ, այն է ՝ ԱՄՆ-ի դաշնակից Ծոցի երկրների ենթակառուցվածքների ոչնչացումը, ինչը վերջիններիս համար իսկական անակնկալ էր: Ուստի, ինչպես նշել է Քոչարյանը, այս իրավիճակում Հայաստանը պետք է կոնկրետ քայլերով, այլ ոչ թե հեռախոսազանգերով Իրանին ապացուցի, որ նախագիծն ամենևին ուղղված չէ իր դեմ ։

TRIPP-ը՝  «Trump route for international peace and Prosperity» (Թրամփի ուղի հանուն միջազգային խաղաղության եւ բարգավաճման) նախագիծը ենթադրում է բազմաֆունկցիոնալ տրանսպորտային միջանցքի ստեղծում Սյունիքի մարզի տարածքով և կոչված է, մի կողմից, Ադրբեջանի հիմնական մասը կապել նրա էքսկլավ Նախիջևանի Ինքնավար Հանրապետության հետ, իսկ, մյուս կողմից, նոր ճյուղ դառնալ, այսպես կոչված, Միջին տրանսպորտային միջանցքի համար, որը կապում է Կենտրոնական Ասիայի երկրները Եվրոպայի հետ: