Կրեմլ․ Հայաստանի կողմից տնտեսական ինտեգրման հետագա ուղու ընտրության հարցը բաց է մնում

Արմինֆո.Հայաստանի կողմից տնտեսական ինտեգրման հետագա ուղու ընտրության հարցը բաց է մնում։ Այդ մասին մայիսի 25-ին ճեպազրույցի ժամանակ հայտարարել է ՌԴ նախագահի մամուլի քարտուղար Դմիտրի Պեսկովը ։

"Օրերս մենք հայտարարություններ ենք լսել և Փաշինյանից, և արտգործնախարարից՝ այն մասին, որ Հայաստանը չի զբաղվելու հակառուսական հռետորաբանությամբ ։ Մենք լսել ենք այդ հայտարարությունները, բայց, միևնույն ժամանակ, բաց է մնում տնտեսական ինտեգրման հետագա ուղու ընտրության հարցը", - նշել է Պեսկովը: Այս առումով նա հավելել է, որ այդ մասին խոսվել է նաև Մոսկվայում Ռուսաստանի նախագահ Վլադիմիր Պուտինի և Հայաստանի վարչապետ Նիկոլ Փաշինյանի հանդիպման ժամանակ: Պեսկովը հիշեցրել է, որ Փաշինյանն այն ժամանակ հայտարարել էր, որ Երևանը մնում է Եվրասիական տնտեսական միության անդամ ՝ողջ ծավալով, բայց, միևնույն ժամանակ, զարգացնում է իր հարաբերությունները այլ վեկտորներով, մասնավորապես՝ Եվրոպայի հետ:

"Ինչպես այն ժամանակ պարզաբանել էր Փաշինյանը, ինչ-որ պահի վերջնական որոշում կկայացվի, և դա արվելու է հանրաքվեով, այսինքն՝ հայ ժողովուրդն է ասելու այդ մասին", - նշել է նա:

Կրեմլում նաեւ խոստովանել են, որ Հայաստանի իշխանություններն՝ իրենք, բազմիցս խոսել են ռուսական գազի, էներգառեսուրսների արտոնյալ, բավական գրավիչ գների մասին։ "Դա իսկապես այդպես է։ Ռուսաստանը մնում է Էներգակիրների հուսալի և պատասխանատու մատակարար բոլոր երկրներին և, հատկապես, մերձավոր դաշնակիցներին ու գործընկերներին։ Բայց, իհարկե, նման ռեժիմը հնարավոր չէ այլ ինտեգրացիաների մասնակիցների համար։ Այնտեղ արդեն գների կատեգորիան այլ է․ այն շուկայական է", - հավելել է Պեսկովը։ Նրա խոսքով՝ հայ գործընկերները շատ լավ տեղեկացված են այդ մասին, Երևանի և Մոսկվայի միջև երկխոսությունը շարունակվում է։

Դիտարկմանը, թե, այսինքն, Հայաստանը բարեկամ է Ռուսաստանի համար, Պեսկովը պատասխանել է՝անշուշտ։ "Մենք Հայաստանի հետ գտնվում ենք ամենաառաջադեմ ինտեգրացիոն գործընթացներից մեկում՝ ԵԱՏՄ- ում", - նշել է Կրեմլի ներկայացուցիչը:

Մայիսի 9-ին Ռուսաստանի նախագահ Վլադիմիր Պուտինը լրագրողների հետ զրույցում Հայաստանին առաջարկել էր հնարավորինս շուտ կողմնորոշվել ԵՄ և ԵԱՏՄ անդամության հարցում՝ նշելով հարկ եղած դեպքում  "քաղաքակիրթ ապահարզան սկսելու" պատրաստակամության մասին: Երևանում՝ ի պատասխան, նշել են, որ ԵԱՏՄ-ը կլքեն, երբ հարկ համարեն։

Նշենք, որ ՀՀ կառավարությունը 2025 թվականի հունվարի 9-ին հավանություն է տվել "ԵվրաՔվե"քաղաքացիական նախաձեռնության կողմից առաջարկված ՝ Եվրոպական միությանն անդամակցելու գործընթաց սկսելու մասին օրենքի նախագծին, որն ուղարկվել էր Հայաստանի խորհրդարանի հաստատմանը։ Մարտի 26-ին երկրի խորհրդարանը վերջնական ընթերցմամբ ընդունել է այն և ուղարկել նախագահի ստորագրմանը։ Փաստաթուղթը ստորագրվել է նույն թվականի ապրիլի 4-ին։ Մոսկվայում հայտարարել են, որ Ռուսաստանը Հայաստանին տեղեկացրել է, որ Եվրասիական տնտեսական միությանը և Եվրամիությանը միաժամանակյա անդամակցությունն անհնար է: