Հայ պատգամավոր․ Հենց հիմա Ադրբեջանը մշակութային ցեղասպանություն է իրականացնում Լեռնային Ղարաբաղում

Արմինֆո.Հենց հիմա Ադրբեջանը մշակութային ցեղասպանություն է իրականացնում Լեռնային Ղարաբաղում, ոչնչացվում և վանդալիզմի են ենթարկվում պատմական վայրեր, հուշարձաններ, գերեզմանատներ և եկեղեցիներ: Այդ մասին Եվրոպայի խորհրդի Խորհրդարանական վեհաժողովի (ԵԽԽՎ) լիագումար նիստում  ելույթի ժամանակ հայտարարել է ընդդիմադիր "Պատիվ ունեմ" խորհրդարանական խմբակցության ղեկավար Հայկ Մամիջանյանը։

Իր ելույթում հայ պատգամավորն անդրադարձել է Հայոց ցեղասպանությանը և նշել, որ այսօր կարծիք կա, որ աշխարհն ունի բոլոր գործիքները նման հանցագործությունները կանխելու համար․  միջազգային իրավունք, ինստիտուտներ, մեխանիզմներ: Սակայն, ըստ նրա, դա խորապես սխալ կարծիք է ։

"2023 թվականին հայերը կրկին բախվել են մարդկության դեմ ծանր հանցագործության ՝ հայերի էթնիկ զտման Լեռնային Ղարաբաղում։ Ավելի քան 100 հազար հայեր ստիպված են եղել լքել իրենց հայրենիքը։ Ինչ-որ մեկը կարող է պնդել, որ դա իրենց ընտրությունն էր կամ որոշումը: Թույլ տվեք բերել մի փաստ, որն ապացուցում է հակառակը․ ավելի քան 60 մարդ Է զոհվել Հայաստան գալու ճանապարհին։ Այո, 21-րդ դարում Եվրոպայում ավելի քան 60 մարդ զոհվեց ՝ փորձելով փրկվել ադրբեջանական ռեժիմից։ Դա ոչ մի կերպ չի կարելի բնութագրել որպես "ընտրություն կամ որոշում"", - նշել է նա։

"Հենց այս պահին Ադրբեջանը մշակութային ցեղասպանություն է իրականացնում Լեռնային Ղարաբաղում։ Հենց հիմա ոչնչացվում են պատմական վայրերը, հուշարձաններն ու եկեղեցիները ։ Ամենաթարմ օրինակը Ստեփանակերտի Սուրբ Աստվածածին եկեղեցին է, որն ամբողջությամբ ավերվել է այս տարվա մարտ-ապրիլ ամիսներին։ Դուք կարող եք ինձ հարցնել, թե ինչու ես չեմ նշում ոչնչացման ճշգրիտ ամսաթիվը: Պատասխանը պարզ է. միակ հասանելի ապացույցը արբանյակային լուսանկարներն են, քանի որ Ադրբեջանը հրաժարվում է թույլ տալ ՅՈՒՆԵՍԿՕ - ի մոնիթորինգային առաքելությունն այդ տարածք", - նշել է նա։

Նրա խոսքով՝ այդ ամենը տեղի է ունեցել ԵԽԽՎ-ին Հայաստանի անդամակցության ժամանակ։ "Ես հրաժարվում եմ հավատալ, որ մեկ բռնապետը կարող է ավելի ուժեղ լինել, քան ողջ քաղաքակիրթ աշխարհը։ Եվ, այնուամենայնիվ, նա շարունակում է իմ 19 հայրենակիցներին պահել Բաքվի բանտերում՝ նրանց ազատ արձակելու ոչ մի մտադրություն չցուցաբերելով ։ Նա շարունակում է օկուպացման մեջ պահել իմ երկրի ավելի քան 200 քառ.կմ տարածք ։ Նա շարունակում է թաքցնել 2020 թվականից ի վեր ավելի քան հարյուր անհետ կորած անձանց մասին տեղեկությունները։ Եվ, չնայած այս բոլոր ողբերգությունների հանդեպ աշխարհի անտարբերությանը, ես կանգնած եմ այստեղ՝ որպես անկախ Հայաստանի Հանրապետության ներկայացուցիչ և դիմում եմ բոլոր նրանց, ովքեր մեզ իրենց թշնամիներն են համարում. դուք ձախողվել եք, ես ողջ եմ",- հայտարարել է Մամիջանյանը։