Մոսկվայի և Բաքվի միջև զենքի վաճառքի գործարքը հասարակական լայն արձագանք գտավ: Ձեր կարծիքով, ինչո՞վ է պայմանավորված Մոսկվայի ռազմավարական դաշնակից Հայաստանի հետ թշնամություն անող պետությանը զենք վաճառելու ՌԴ որոշումը:

Ինչպես հայտնի է, Ռուսաստանը Հայաստանի հետ կապված է ՀԱՊԿ անդամությամբ, ուստի պայմանագրային հարաբերությունները նրանց միջև անհամեմատ ավելի խորն են, քան Մոսկվայի և Բաքվի հարաբերությունները: Հայ-ռուսական հարաբերություններին բնորոշ է սերտ փոխգործակցությունը բոլոր հիմնական ոլորտներում: Սակայն հարկավոր է նաև հաշվի առնել, որ Ադրբեջանը Ռուսաստանի համար բնավ թշնամի պետություն չէ: Եվ մենք Ռուսաստանում մեծ ցավով ենք հետևում հայ և ադրբեջանցի ժողովուրդների միջև հակամարտությանը: Ինչ վերաբերում է սպառազինությունների վաճառքին, ապա ես, իհարկե, չգիտեմ, թե ինչ տրամաբանությամբ է գործում Ռուսաստանի կառավարությունը կամ նախագահը: Սակայն կարծում եմ, որ տարածաշրջանում ուժերի հաշվեկշռի պահպանումը խաղաղության և կայունության երաշխիք է: Եթե զինաթափում չի ստացվում, ապա սպառազինությունների հաշվեկշռի պահպանումը ինչ-ինչ ռազմական գործողություններից, ուժի կիրառումից զերծ մնալու երաշխիք է: Ադրբեջանին սպառազինության վաճառքում հակահայկական ոչինչ չկա:

Ռուսական կողմին չի՞ մտահոգում այն, որ սպառազինության մատակարարումները հանգեցնում են հայ հասարակությունում հակառուսական տրամադրությունների նոր ալիքի:

Կարծում եմ`նման մտահոգություն չկա, քանի որ հասարակության տրամադրությունները թե’ Հայաստանում, թե’ Ռուսաստանում չեն ազդում քաղաքական գործիչների կողմից ընդունվող որոշումների վրա: Ռուսաստանը չի կարող ղարաբաղյան հակամարտությունում հայամետ կամ ադրբեջանամետ դիրք գրավել: Մենք Ադրբեջանի հետ ունենք ընդհանուր սահման, հսկայական ապրանքաշրջանառություն, միլիոնավոր ադրբեջանցիներ ապրում և աշխատում են ՌԴ տարածքում: Հայաստանի հետ նույնպես մեզ կապում են տնտեսական, մարդկային գործոններ, ռազմավարական գործընկերություն: Մոսկվան հավատարիմ կմնա բոլոր այդ գործընթացներում ինչ-որ հավասարակշռության պահպանմանը: Մենք թույլ չենք տա որևէ մեկին ռազմական ճնշող առավելություն ունենալ մյուսի հանդեպ, և, կարծում եմ, դա ճիշտ մոտեցում է: 

Ռուս քաղաքական գործիչները զենքի վաճառքի գործարքն արդարացնում են այն բանով, որ Ռուսաստանն իբր չի ցանկանում զրկվել իր զենքի իրացման շուկայից, որ իր փոխարեն Ադրբեջանին սպառազինություն են մատակարարում ԱՄՆ-ը, Թուրքիան կամ Իսրայելը: Որքանո՞վ են կենսունակ նման պնդումները:

Ես չեմ բացառում նման տարբերակը, քանի որ Իսրայելը, ցավոք, ակտիվորեն ներկա է Ադրբեջանում: Ադրբեջանն իր տարածքը տրամադրում է ՆԱՏՕ-ի զորքերի, ինչպես նաև իսրայելական հետախուզական ստորաբաժանումների համար: Կարծում եմ, որ այս իրավիճակում Ռուսաստանին խիստ կարևոր է ուժերի հավասարակշռություն պահպանել տարածաշրջանում: Բան այն չէ, որ Ռուսաստանը վախենում է կորցնել Ադրբեջանը որպես զենքի արտադրանքի սպառման շուկա և այն զիջել, օրինակ, Միացյալ Նահանգներին: Չէ որ, եթե ԱՄՆ ցանկանա զենք մատակարարել, դա կանի` անկախ Ռուսաստանից: Մենք արդեն բախվել ենք այն բանին, որ ամերիկացիները ՙսեղմելով անց են կացնում՚ իրենց որոշումները ցանկացած գնով: Կարծում եմ, որ տարածաշրջանում բավականին լուրջ իրադարձությունների, Իրանի շուրջ պատերազմի սպառնալիքի լույսի ներքո սպառազինությունների հաշվեկշիռը, դժբախտաբար, երաշխիք է այն բանի, որ հակամարտող կողմերը սխալ որոշումներ չեն կայացնի ուժային ճանապարհով ինչ-որ նպատակների հասնելու վերաբերյալ:

 Հայաստանում Ֆրանսիայի դեսպան Անրի Ռենոն ղարաբաղյան հակամարտության կողմերին կոչ է արել հավատարիմ մնալ բանակցային գործընթացի`արդեն գոյություն ունեցող ձևաչափին: Այդ մասին դեսպանը հայտարարել է Երևանում մամլո ասուլիսի ժամանակ`մեջ բերելով ղարաբաղյան խնդրի կարգավորման ձևաչափի պահպանման անհրաժեշտության վերաբերյալ ԵԱՀԿ Մինսկի խմբի համանախագահող երկրների նախագահների հայտարարությունը:

ՙԿողմերը պետք է փորձեն գտնել ղարաբաղյան հակամարտության լուծման խաղաղ ճանապարհը`բացառապես ԵԱՀԿ ՄԽ շրջանակներում, Հելսինկյան և Մադրիդյան սկզբունքներին համապատասխան: Կոչ եմ անում կողմերին գնալ այդ ճանապարհով, քանի որ այն այլընտրանք չունի՚,- ասել է ֆրանսիացի դիվանագետը:

 Փակ շուկայի շուրջ սկանդալները չեն հանդարտվում: Հունիսի սկզբին Երևանիք քաղաքապետարանը հայտարարել էր շենքի հետևի մասի երկաթբետոնե կառուցվածքների ապամոնտաժման աշխատանքների մեկնարկի մասին, սակայն ճարտարապետները համոզված են, որ դա սոսկ գործողությունների իմիտացիա է, որը նպատակաուղղված է գործերի իրական վիճակի քողարկմանը: Ինչպես հունիսի 28-ին հաղորդել է Հայաստանի ճարտարապետների միության ղեկավար Մկրտիչ Մինասյանը, ներսից Փակ շուկան արդեն հարկերի է բաժանվել, ինչը հակասում է շեննքի նախնական տեսքի վերականգնման վերաբերյալ հայտարարություններին:

Օմբուդսմենի գրասենյակում Փակ շուկայի խնդրի շուրջ քննարկումներում Մինասյանը վրդովմունքով նշել է, որ արդյունքում` ոչ մի կառույց, այդ թվում նաև Երևանի քաղաքապետարանը, չի կարող ապահովել հանրապետական նշանակության հուշարձանի պահպանությունը: Ընդ որում նա նշել է, որ ճարտարապետները հազիվ են զսպում Փակ շուկայի  մոտ բողոքի տևական ակցիա անցկացնելու ցանկությունը: Նրա ասելով, Ճարտարապետների միության բոլոր անդամները համակարծիք են այն հարցի շուրջ, որ Փակ շուկայի նախնական տեսքը պետք է վերականգնվի:

Միևնույն ժամանակ փարձագետները բախվում են այդ խնդրի նկատմամբ պաշտոնատար անձանց լիակատար անտարբերությանը: Օրինակ, օմբուդսմենի գրասենյակում քննարկմանը մասնակցելու էին հրավիրվել, մասնավորապես, Մշակույթի նախարարության,  Գլխավոր դատախազության, Փակ շուկայի սեփականատեր ընկերության ներկայացուցիչներ: Սակայն միջոցառմանը ներկա էին միայն Քաղաաշինության նախարարության և քաղաքապետարանի ներկայացուցիչներ, թեև, ինչպե նշել է Մինասյանը, ելնելով Փակ շուկայի կարևորությունից, քննարկումներին պետք է ներկա լինեին մշակույթի և քաղաքաշինության փոխնախարարները, ինչպես նաև Երևանի գլխավոր ճարտարապետը:

ՀՀ ԱԺ փոխնախագահ Էդուարդ Շարմազանովը հունիսի 28-ին Աթենքում հանդիպում է ունեցել Հունաստանի խորհրդարանի փոխխոսնակ Իոաննիս Տրագակիսի հետ:

Կողմերը քննարկել են Հայաստանի եվրաինտեգրմանն առնչվող հարցեր: Իոաննիս Տրագակիսը նշել է, որ 2014-ի հունվարի 1-ից Հունաստանը կստանձնի ԵՄ նախագահությունը: Նա վերահաստատել է, որ Հունաստանը պատրաստակամ է սատարել Հայաստանի՝ Եվրամիության հետ հարաբերությունների ամրապնդմանն ու խորացմանն ուղղված ջանքերին:

Հույն գործընկերոջ հետ զրույցում Էդուարդ Շարմազանովն անդրադարձել է Հարավային Կովկասի տարածաշրջանի անվտանգության խնդիրներին՝ հավաստիացնելով, որ Հայաստանը կողմ է բոլոր ժողովուրդների հետ խաղաղ գոյակցությանը:

ԱԺ փոխնախագահն Իոաննիս Տրագակիսին ներկայացրել է ԼՂ հակամարտության շուրջ բանակցությունների ներկայիս փուլը: Նա ընդգծել է, որ առանց Արցախի՝ բանակցային գործընթացում լիարժեք մասնակցության անհնար է հասնել խնդրի հանգուցալուծմանը:
Էդուարդ Շարմազանովը վերահաստատել է, որ Հայաստանն ու Լեռնային Ղարաբաղը կողմնակից են խնդրի բացառապես խաղաղ կարգավորմանը, ինչը համահունչ է ԵԱՀԿ Մինսկի խմբի եռանախագահների մոտեցումներին: ԱԺ փոխնախագահն իր մտահոգությունն է հայտնել Ադրբեջանում սաստկացող ռազմատենչ հռետորաբանության առնչությամբ` նշելով, որ այն լուրջ վնաս է հասցնում ԼՂ բանակցային գործընթացին:

Իր հերթին, Հունաստանի խորհրդարանի փոխխոսնակը վերահաստատել է, որ Հունաստանը կողմ է ԼՂ հակամարտության խաղաղ կարգավորմանը: Հանդիպման ժամանակ քննարկվել են տարբեր ոլորտներում երկու երկրների փոխհարաբերությունների եւ միջխորհրդարանական կապերի զարգացմանն առնչվող հարցեր: Կողմերն անդրադարձել են նաեւ առեւտրաարդյունաբերական երկկողմ կապերի զարգացմանն առնչվող հարցերի: ԱԺ փոխնախագահն Իոաննիս Տրագակիսին տեղեկացրել է, որ 2013-ի սեպտեմբերին Երեւանում կկայանա հայ-հունական գործարար համաժողով:

 Հայկական և թուրքական հասարակության շերտերի համագործակցությունը բխում է երկու ժողովուրդների շահերից, հունիսի 28-ին Երևանում ՙՀարավային Կովկասի աշխարհաքաղաքականությունը և հայ-թուրքական հարաբերությունները՚ խորհրդաժողովի ժամանակ հայտարարել է Գլոբալիզացիայի և տարածաշրջանային համագործակցության վերլուծական կենտրոնի տնօրեն Ստեփան Գրիգորյանը:

ՙՀայ-թուրքական հարաբերություններն այսօր գտնվում են սառեցված վիճակում, հայտնի և նաև պաշտոնական Երևանի դիրքորոշումը`առանց հայ-թուրքական արձանագրությունների վավերացման հարաբերությունների կարգավորման մասին խոսք անգամ չի կարող լինեկ: Բայց քաղաքական հարաբերություններից բացի, կարելի է հարաբերություններ կառուցել նաև հասարակական մակարդակով: Կարծում եմ, որ այդ ոլորոտում անհրաժեշտ է շարունակել համագործակցությունը, քանի որ այսօր թուրքական հասարակայնությունը դրական է տրամադրված հայերի հանդեպ՚,- ընդգծել է Գրիգորյանը:

Անդրադառնալով Թուրքիայում տեղի ունեցող վերջին գործընթացներին`Գրիգորյանը հայտարարել է, որ շատ դժվար է ասել, թե ինչպես է հետագայում զարգանալու իրավիճակը, բայց այն, որ դա կանդրադառնա Հայաստանի հետ հարաբերությունների վրա, միանշանակ է: Փորձագետի կարծիքով, պաշտոնական Անկարան ստիպված կլինի քայլեր ձեռնարկել իր միջազգային հեղինակության վերականգնման ուղղությամբ, և նման քայլերից մեկը կարող է հայ-թուրքական հարաբերությունների կարգավորումը դառնալ:

Թուրք գիտնական Բուրաք Բիլգեհան Օզփեքն իր հերթին ընդգծել է, որ փոփոխվող աշխարհում շատ դժվար է հասկանալ, թե ով է ընկեր, ով`թշնամի: ՙՄեկ գիշերում ընկերը կարող է թշնամի դառնալ, իսկ թշնամին`ընկեր, դեռ մի քանի տարի առաջ Սիրիայի նախագահ Բաշար Ասադը և վարչապետ Ռեջեփ Թայիփ Էրդողանը լավ ընկերներ էին, իսկ այսօր իրավիճակը բոլորովին այլ է՚,- նշել է նա:

 Հուլիսի 9-14-ը ՙՈսկե ծիրան՚ X միջազգային կինոփառատոնի շրջանակներում տեղի կունենա ՙՌեժիսորներ առանց սահմանների՚ համատեղ կինոարտադրության VII տարածաշրջանային ֆորումը:

Ինչպես այսօր մամլո ասուլիսի ժամանակ պատմել է ՙՈսկե ծիրանի՚ արտ տնօրեն Սուսաննա Հարությունյանը, ՙՌեժիսորներ առանց սահմանների՚ նպատակն է`խրախուսել Հայաստանի, Բելառուսի, Վրաստանի, Մոլդովայի, Ուկրաինայի և Ադրբեջանի միջև համաարտադրությունը:
Այս տարի ֆորումին մասնակցելու համար ընտրվել է Արևելյան գործընկերության երկրների 12 նախագիծ:

Անցած տարի ՙՌեժիսորներ առանց սահմանների՚ ֆորումն ընդլայնել է իր ձևաչափը`շնորհիվ Եվրամիության դրամաշնորհի: 3 տարվա համար նախատեսված ծրագրի շրջանակներում 2012 թ. իրականացվել են այնպիսի մասշտաբային ծրագրեր, ինչպես ՙԿինոժուռնալիստիկան առանց սահմանների՚, ՙՀայաստան-Թուրքիա կինոպլատֆորմը՚, ինչպես նաև սցենարների մշակման սեմինար`Հայաստանի, Վրաստանի, Ուկրաինայի, Բելառուսի և Մոլդովայի կինոգործիչների մասնակցությամբ:

Հարությունյանը նշել է, որ ավելի վաղ ՙՌեժիսորներ առանց սահմանների՚ շրջանակներում ներկայացված նախագծերից շատերը հաջողություն են ունեցել տեղական և միջազգային մակարդակով: 
Բացի այդ, Հայաստան-Թուրքիա կինոպլատֆորմի աջակցությանն արժանացած Լուսին Դինքի ՙSaroyanLand՚ ֆիլմն այս տարի ներառվել է Ստամբուլի 32-րդ միջազգային կինոփառատոնի ազգային մրցույթ անվանակարգում: Հայ հանդիսատեսը ֆիլմը կարող է դիտել ՙՈսկե ծիրան՚ X միջազգային կինոփառատոնի շրջանակներում: Ինչպես տեղեկացրել է Հարությունյանը, Հայաստան-Թուրքիա կինոպլատֆորմի շրջանակներում հայ և թուրք կինոգործիչների հանդիպումը տեղի կունենա Երևանում հուլիսի 8- 10-ը:
ՙՈսկե ծիրան՚ X միջազգային կինոփառատոնը տեղի կունենա Երևանում հուլիսի 7-14-ը: Փառատոնի գլխավոր հովանավորը ՙՎիվաՍել-ՄՏՍ՚ ընկերությունն է:

Չնայած ղարաբաղյան հակամարտության գոտում լարվածությանը` նոր պատերազմի հավանականությունը մեծ չէ, հունիսի 28-ին Գյումրիում լրագրողներին հայտարարել է ՀՀ պաշտպանության նախարար Սեյրան Օհանյանը:

Նախարարն ընդգծել է, որ մեծ հաշվով պատերազմի սպառնալիք միշտ կա, սակայն հայկական զինված ուժերը հետևողականորեն բարձրացնում են իրենց մարտունակությունը: ՙՄենք ամեն օր պարտավոր ենք պատրաստ լինել հակառակորդի ագրեսիայի հետմղմանը՚,- ասել է նախարարը:

Ինչ վերաբերում է Բաքվի կողմից պարբերաբար հնչող ռազմատենչ հայտարարություններին, Օհանյանի կարծիքով, դրանք ուղղված են Հայաստանի կողմից միակողմանի զիջումների հասնելուն, սակայն այդ փորձերը դատապարտված են: ՙՄեկ անգամ մեզ արդեն ներքաշել են պատերազմի մեջ, բայց մեզ հաջողվել է պաշտպանել Լեռնային Ղարաբաղը և մեր սահմանները: Այսօր անհնար է ստիպել մեզ միակողմանի զիջումների գնալ: Հայկական կողմը հանդես է գալիս փոխըմբռնման հիման վրա հակամարտության խաղաղ կարգավորման օգտին՚,- նշել է պաշտպանական գերատեսչության ղեկավարը:

Նա նաև ավելացրել է, որ հակառակորդի կողմից զենքի գնումները մտահոգում են Հայաստանին, սակայն պետք է նաև հաշվի առնել, որ Հայաստանի և Ռուսաստանի միջև ռազմատեխնիկական համագործակցությունը գտնվում է բավականին բարձր մակարդակի վրա, և Հայաստանը հաջողությամբ պահպանում է ուժերի հավասարակշռությունը`գերճշգրիտ և որակյալ զենքի, ինչպես նաև արհեստավարժ անձնակազմի միջոցով:

Ռուս-ադրբեջանական զենքի վաճառքի գործարքից հետո Հայաստանի իշխանությունները պետք է սառեցնեին Մոսկվայի հետ դիվանագիտական հարաբերությունները, հունիսի 28-ին մամլո ասուլիսի ժամանակ այդպիսի կարծիք է հայտնել ԱԻՄ ղեկավար Պարույր Հայրիկյանը:

Ադրբեջանը $1 մլրդ գումարի ռազմական տեխնիկա է գնել Ռուսաստանից: 2010-2011 թթ. կնքվել և իրագործվել են ադրբեջանական զինված ուժերին և ուժային այլ կառույցներին շուրջ $3 մլրդ գումարի զենքի մատակարարման պայմանագրեր:

ՙՍա հակառուսական հիստերիա չէ, այլ ճիշտ մոտեցում ՙռազմավարական գործընկերոջ՚ նկատմամբ՚,- նշել է նա: Քաղաքական գործիչը զարմացած է նաև այդ փաստի առնչությամբ հայ հասարակության և ընդդիմության անտարբերությամբ: Նրա կարծիքով, պետք է բողոքի ալիք բարձրանար, ինչը կսթափեցներ Ռուսաստանին:

Խոսելով իր նկատմամբ մահափորձի մասին`Հայրիկյանն ընդգծել է, որ դրանում ևս ռուսական հետք է տեսնում: Նա վստահ է, որ մահափորձն իրականացրել են ռուսական ՙիմպերիալիստները՚, ովքեր տասնյակ տարիներ հետևել են իրեն:

Նախագահ Վլադիմիր Պուտինը Թուրքիայի վարչապետԷրդողանին ետ պահեց Սիրիայի դեմ ռազմական օպերացիայից: Այս մասին ԱրմԻնֆո գործակալության թղթակցի հետ զրույցում հայտարարել է ռուսաստանյան քաղաքագետ, պրոֆեսոր Իգոր Պանարինը:

Ըստ քաղաքագետի, Ստամբուլում և թուրքական մյուս խոշոր քաղաքներում տեղի ունեցած հակակառավարական վերջին ցույցերը կազմակրպված էին արտաքին ուժերի կողմից, որոնք դժգոհ էին Բաշար Ասադի դեմ պատերազմից հրաժարվելու Էրդողանի քաղաքականությունից:

ՙԴամասկոսի գրավումը նախատեսված էր 2012 թվականի դեկտեմբերին, և այդ գործի առանցքային դարակատարը պետք է լիներ Էրդողանը: Բայց բանակցություններ տեղի ունեցան Պուտինի և թուրքական վարչապետի միջև, որից հետո, ինձ թվում է, որ Թուրքիան մի փոքր փոխեց իր դիրքորոշումը: Ես կցանկանայի, որպեսզի թուրքական վերնախավում հաղթեր ողջախոհությունը, և նրանք չմասնակցեին հակասիրիական ավանտյուրային՚,-ասել է քաղաքագետը:

Պանարինը կիսում է նաև այն միտքը, որ սիրիական ահաբեկիչների, այսպես կոչված զինված ընդդիմության, շարքերում կռվող թուրք վարձյալների նշանակետերից մեկն էլ հանդիսանում է սիրիահայությունը` Օսմանյան կայսրությունում իրականացված ցեղասպանությունից փրկված հայերի ժառանգները: ՙԻմ կարծիքով, այս ամենը շատ նուրբ և գլոբալ խաղ է: Իսլամական ծայրահեղականներն առաջին հերթին ոչնչացնում են քրիստոնյա բնակչությանը, ընդ որում, ինչպես կաթոլիկներին, որոնց թիվը Սիրիայում հազնում է 2 միլիոնի, այնպես էլ հայերին՚,-հայտարարել է նա:

 Հայերը և հույները պետք է միավորեն իրենց ջանքերը թուրքական ժխտողականության դեմ պայքարում: Այս մասին նախօրեին Աթենքում հայտարարել է ՀՀ ԱԺ փոխնախագահ, Հայաստան-Հունաստան բարեկամության խմբի ղեկավար Էդուարդ Շարմազանովը, Հունաստանի խորհրդարանի նախկին խոսնակ, Հունաստան-Հայաստան բարեկամության խմբի ղեկավար Ապոստոլոս Կակլամանիսի հետ հանդիպմանը:

Ինչպես ԱրմԻնֆո գործակալությանը տեղեկացվել է ՀՀ ԱԺ մամուլի ծառայությունից,
ողջունելով  ՀՀ ԱԺ փոխնախագահին` Ապոստոլոս Կակլամանիսը բարձր է գնահատել հայ եւ հույն ժողովուրդների` դարերի խորքից եկող ջերմ եւ բարեկամական հարաբերությունները: Նա նշել է, որ իր` Հունաստանի խորհրդարանի խոսնակ լինելու օրոք`1996-ին է երկրի խորհրդարանը միաձայն ճանաչել Հայոց ցեղասպանությունը:

Շնորհակալություն հայտնելով ջերմ ընդունելության համար` ԱԺ փոխնախագահ Էդուարդ Շարմազանովը նշել է, որ 20-րդ դարասկզբին տեղի է ունեցել Օսմանյան կայսրության տարածքում բնակվող հայերի, հույների, ասորիների եւ քրիստոնյա բնիկ այլ փոքրամասնությունների ցեղասպանություն` ընդգծելով, որ հայերը եւ հույները պետք է միավորեն իրենց ջանքերը թուրքական ժխտողականության դեմ պայքարում: ԱԺ փոխնախագահը Կակլամանիսին տեղեկացրել է, որ ՀՀ Ազգային ժողովը կոչով դիմել է աշխարհի խորհրդարաններին՝ ճանաչելու մյուս քրիստոնյա ժողովուրդների, այդ թվում՝ Պոնտոսի հույների ցեղասպանությունը:

Իր հերթին, Հունաստան-Հայաստան բարեկամության խմբի ղեկավարն ընդգծել է, որ անրաժեշտ է անել ամեն ինչ` նոր ցեղասպանությունների իրագործումը բացառելու համար:

Անդրադառնալով երկու երկրների միջեւ գոյություն ունեցող հարաբերություններին` կողմերը կարեւորել են բարեկամական խմբերի առավել ակտիվ եւ արդյունավետ համագործակցության, միջխորհրդարանական պատվիրակությունների փոխայցերի շրջանակներում առարկայական ու կոնկրետ ծրագրերի մշակման եւ դրանց հետեւողական իրագործման անհրաժեշտությունը:
 
Հանդիպմանը քննարկվել են նաեւ ԵՄ-ի հետ մերձեցման ուղին բռնած Հայաստանին Հունաստանի հնարավոր աջակցությանը եւ տարածաշրջանային անվտանգությանն առնչվող հարցեր:

ԱրմԻնֆո գործակալության կողմից Երևանի բանկերից ստացված տվյալների համաձայն, տարադրամի փոխանակման բանկային կետերում այսօր ԱՄՆ դոլարի առքի առավելագույն գինը 1 դոլարի դիմաց կազմել է 409 դրամ, ԵՎՐՈ-ի առքի առավելագույն գինը`532 դրամ, իսկ ռուսական ռուբլու առքի գինը`12.45 դրամ: ԱՄՆ դոլարի վաճառքի նվազագույն գինը կազմել է 410 դրամ, ԵՎՐՈ-ի վաճառքի գինը` 536.5 դրամ, իսկ ռուսական ռուբլու վաճառքի գինը`12.6 դրամ:

Արարատյան թեմը կրկին հերքում է ՙօֆշորային գործին՚ Հայրապետական թեմի առաջնորդական փոխանորդ Նավասարդ Կճոյանի առնչության վերաբերյալ Hetq.am-ի տեղեկատվությունը: Այս մասին ԱրմԻնֆո գործակալությանը տեղեկացվել է Արարատյան Հայրապետական թեմ    մամուլի ծառայությունից:
 
Նշենք, որ Hetq.am կայքում նախօրեին տեղեկություն էր հրապարակել, որի համաձայն Արարատյան Հայրապետական թեմի առաջնորդական փոխանորդ Նավասարդ արք.Կճոյանը, ՀՀ վարչապետ Տիգրան Սարգսյանը և Աշոտ Սուքիասյանը 2010թ. հանդիպել են գործարարներ Ռուբեն Մկրտչյանին, Սերգեյ Տրյուկազյուկն, Ալեքսանդր Վալչիկովսկին, միասին ճաշել ՙՆոյան տապան՚ ռեստորանում, իսկ այնուհետև Ռուբեն Մկրտչյանը անգամ ուղեկցել է Աշոտ Սուքիասյանին և Նավասարդ արք. Կճոյանին օդանավակայան: Այս մասին իր հարցազրույցում նշել է ինքը՝ Ռուբեն Մկրտչյանը:

Կճոյանը հայտարարում է, որ վերոնշյալ տեղեկատվության և ոչ մի կետ չի համապատասխանում իրականությանն ու հանդիսանում է նախկինում հնչող զրպարտությունների շարքի տրամաբանական շարունակությունը: Արարատյան հայրապետական թեմը կոչ է անում հասարակությանը չտրվել միտումնավոր տարածվող նմանատիպ ապատեղեկատվությունների ազդեցությանը:

Նշենք նաև, որ ավելի վաղ Hetq.am-ում հրապարակվել էր ՙՈվքեր են Փայլակ Հայրապետյանի ունեզրկման հեղինակները. օֆշորային եռյակը՚ վերնագրով նյութը, որի համաձայն, Կիպրոսում գրանցված ՙWLISPERA HOLDINGS LIMITED՚ օֆշորային ընկերության բաժնետերերն են ՀՀ վարչապետ Տիգրան Սարգսյանը, Արարատյան թեմի առաջնորդ Նավասարդ արքեպիսկոպոս Կճոյանը եւ «ադամանդագործե Աշոտ Սուքիասյանը: Այս ընկերությունն ուղղակի առնչություն ունի գործարար Փայլակ Հայրապետյանի ունեզրկման հետ: Վարչապետը բազմաթիվ անգամներ հերթեց այդ տեղեկությունները, միաժամանակ նամակ հղելով Գլխավոր դատախազությանը և խնդրելով կատարել համապատասխան հետաքննություն: Կճոյանը նույնպես հերքեց այդ տեղեկությունները: Սակայն, Աշոտ Սուքիասյանը հայտարարեց, որ նշված ընկերությունը հիմնել է ինքը, գրանցելով այն Սարգսյանի և Կճոյանի անուններով, առանց վերջիններիս գիտության և համաձայնության: ՙԵս գնացի այդ քայլին, որպեսզի ապահովագրեմ իմ բիզնեսը կողմնակի ոտնձգություններից: Ես չէի գիտակցում, թե ինչպիսի հետևանքներ կարող է դա ունենալ՚,-ընդգծել էր նա:

ՀՀ խորհրդարանի խոսնակ Հովիկ Աբրահամյանը Վերահսկիչ պալատի 2012 թվականի հաշվետվությունն ուղարկել է Գլխավոր դատախազություն: Այս մասին ՙԱզատություն՚ ռադիոյին հաղորդել է գլխավոր դատախազի մամուլի քարտուղար Սոնա Տռուզյանը:

Ըստ Տռուզյանի, Հովիկ Աբրահամյանի հանձնարարականով ուղարկված նամակն արդեն օրենքով սահմանված կարգով ընդունվել է որպես վարույթ: Մասնավորապես, Գլխավոր դատախազության պետական շահերի պաշտպանության վարչությունն ուսումնասիրում է ՎՊ կողմից բացահայտված փաստերը, և այն այն խախտումները, որոնք կլինեն իրավա-քրեական բնույթի, կարժանանան իրավական գնահատականների:

Հիշեցնենք, որ ավելի վաղ Հայաստանի Վերհսկիչ պալատի նախագահ Իշխան Զաքարյանը խորհրդարանին էր ներկայացրել անցյալ տարվա հաշվետվությունը: Համաձայն փաստաթղթի, բացահայտվել են բազմաթիվ չարաշահումներ, մասնավորապես, շինարարության և պետգնումների ոլորտներում: Այդ առիթով ԱԺ խոսնակ Հովիկ Աբրահամյանը հայտարարեց, որ անփոխարինելի պաշտոնյաներ չկան, և անհրաժեշտ է ազատվել այն անձանցից, ովքեր զբաղված են պետական միջոցների թալանով

Ղարաբաղյան խնդիրը պետք է լուծվի ոչ թե ռազմական, այլ խաղաղ ճանապարհով: Ինչպես հաղորդում է Trend-ը, հունիսի 27-ին Բաքվի Ամերիկյան կենտրոնում ուսանողների հետ հանդիպման ժամանակ հայտարարել է ՄԱԿ-ի գլխավոր քարտուղարի հատուկ ներկայացուցիչ Ամիր Դոսսալը:

Նրա խոսքով, ղարաբաղյան հակամարտությունը գերակայություն չէ համաշխարհային հանրության համար: ՙԱյսօր ողջ համաշխարհային հանրության ուշադրությունը կենտրոնացած է սիրիական խնդրի վրա: Սիրիայում ամեն օր բազմաթիվ մարդիկ են զոհվում՚,- նշել է նա:

Պետական կառույցների կայացածության առումով Հայաստանը աշխարհի 178 պետությունների շարքում 105-րդն է: Այս մասին է նշվում Վաշինգտոնում գործող Խաղաղության հիմնադրամի և հեղինակավոր Foreign Policy հանդեսի հրապարակած ամենամյա զեկույցում, որի տվյալները վերաբերում են այսպես կոչված ՙձախողված պետություններին՚:

Հայաստանը, ըստ զեկույցի հեղինակների, գտնվում է բարձր ռիսկայնության գոտում, քանի որ ամենալուրջ խնդիրը, որն առկա է Հայաստանում, ըստ փորձագետների, դա այսպես կոչված ՙիշխող էլիտաների մասնատվածությունն է՚: ՙԱյս ձևակերպման տակ նկատի ունենք պայքարն իշխանության համար, ընտրախախատումների առկայությունը, քաղաքական ճամբարների փոփոխությունը: Մի իրավիճակ, երբ տեղական և ազգային մակարդակի առաջնորդները հայտնվում են փակուղում՚, – նշում են զեկույցում: Զեկույցի հեղինակները քաղաքական չափորոշիչները ևս Հայաստանում համարում են բավական անմխիթար և հիմնական խնդիրներն են համարվում պետական կառույցների լեգիտիմության, օրենքի գերակայության ապահովումն ու մարդու իրավունքների պաշտպանության անհրաժեշտությունը: Հայաստանում մեծ է նաև արտաքին ուժերի ներգրավվածության մակարդակը պատական կառույցներում: Նշվում է, որ այս ցուցանիշը, բարձր է լինում, երբ պետության տարածքում տեղակայված են լինում այլ պետության ռազմական ուժեր: Նշենք, որ տվյալները վերաբերվում են այսպես կոչված ՙձախողված պետություններին՚: Սոցիալական չափորոշիչների առումով Հայաստանի հիմնական խնդիրներ են համարվում փախստականների առկայության, ինչպես նաեւ արտագաղթի ծավալները:

Զեկույցի հեղինակները աշխարհի պետություններում տիրող կացությունը դիտարկում են միանգամից 12 սոցիալական, քաղաքական, տնտեսական չափորոշիչներից ելնելով` դրանց միջոցով փորձելով պարզել այս կամ այն պետությանը բնորոշ թույլ կողմերը: Ամերիկացի փորձագետները այս ոլորտները գնահատում են 10-բալլանոց սանդղակով, և որքան բարձր է պետության ստացած գնահատականը, այնքան ավելի անմխիթարական վիճակում է այն գտնվում: Օրինակ, Հայաստանն ամերիկացի վերլուծաբանների հաշվարկների համաձայն, 120 հնարավորից 71 միավոր է ստացել` հայտնվելով այնպիսի պետությունների հարևանությամբ, ինչպիսին են Սուրինամը, Պարագվայը, Պերուն, Նամիբիան և Կուբան: Վրաստանը 120 հնարավորից շուրջ 84 միավոր է հավաքել: Այստեղ հիմնական խնդիրները երկրի ներքին զարգացումներին արտաքին միջամտության բարձր մակարդակն է և իշխող վերնախավի մասնատված վիճակը: Ադրբեջանի պարագայում իրավիճակը գրեթե նույնն է: Որպես առանցքային խնդիրներ մատնանշվում են փախստականների մեծ բանակի առկայությունն ու պետական հաստատությունների լեգիտիմության ցածր մակարդակը:

 ՙԱրմենՏել՚ ընկերության (ապրանքանիշը Beeline) նորանշանակ Գլխավոր տնօրեն Անդրեյ Պյատախինի առաջին հանդիպումը ԶԼՄ-ների ներկայացուցիչների հետ տեղի ունեցավ այսօր ՙԱրմենիա Մարիոթ՚ հյուրանոցի  ՙԱշոտ Երկաթ՚ սրահում: Հանդիպման ընթացքում Անդրեյ Պյատախինը ներկայացրեց ընկերության դիրքորոշման նոր հայեցակարգը, իր բիզնես տեսլականը, ինչպես նաև խոսեց  ընկերության գործունեության և հետագա ծրագրերի մասին:

Ինչպես ԱրմԻնֆո գործակալությանը տեղեկացվել է Ընկերության մամուլի ծառայությունից,
մամլո ասուլիսի ընթացքում Ա.Պյատախինն ընդգծեց ՙԱրմենՏել՚ ընկերության ռազմավարական կարևորությունը և դերը ՙՎիմպելԿոմ՚ ընկերության բիզնես ծրագրերի իրականացման գործընթացում:

ՙԻնձ համար մեծ պատիվ է ղեկավարել Հայաստանում հեռահաղորդակցության խոշորագույն օպերատոր ՙԱրմենՏել՚ ընկերության պրոֆեսիոնալ թիմը: Մեր աշխատանքի իրականացման բոլոր փուլերում մենք առաջնորդվելու են հեռահաղորդակցության ոլորտի ագրեսիվ զարգացմամբ, արդի նորարարական լուծումների և ընկերության սոցիալական պատասխանատվության նոր հայեցակարգի ներդրմամբ, ինչպես նաև առավելագույն ուշադրության ենք դարձնելու բաժանորդների սպասարկման որակին: Համոզված եմ, որ ՙՎիմպելկոն՚ ընկերության միջազգային փորձը, մասնագիտացված աշխատակազմը և եվրոպական նոր բիզնես մոդելների կիրառաումը մեզ հնարավորություն կտա գրավել առաջատար դիրք երկրի հեռահաղորդակցության շուկայի բոլոր ոլորտներում՚,- նշեց  ՙԱրմենՏել՚ ընկերության Գլխավոր Տնօրենը Անդրեյ Պյատախինը:

Ի դեպ Անդրեյ Պյատախինը ստանձնել է իր պաշտոնական պարտականությունները սույն թվականի հունիսի 19-ից, իսկ մինչ այդ զբաղեցնում էր Beeline ընկերության փոխնախագահի պաշտոնը:

Նշենք, որ 2013 թվականի առաջին եռամսյակի արդյունքներով ԱրմենՏելի շարժական կապի ակտիվ բաժանորդների թիվը կազմել է 756.4 հազար, գրանցելով տարկան 0.5% աճ, իսկ ինտերնետի բաժանորդների թիվը կազմել է 27.9 հազար, գրանցելով տարեկան 13.9% աճ: Մյուս ծառայություններից օգտվող բաժանորդների թիվը կազմել է 119.6 հազար, գրանցելով տարեկան 5.3% աճ:

Ըստ ԱրմԻնֆո գործակալության` ՙՀայաստանի խոշորագույն ձեռնարկությունների ֆինանսական վերլուիծություն՚ վերլուիծական տեղեկագրի, ԱրմենՏելի ակտիվները 2012 թվականի արդյունքներով կազմել են 125.5 մլրդ.դրամ, ապրանքա-նյութական պահուստները` 2.5 մլրդ.դրամ: Ընկերությա հասույթը 2012 թվականին կազմլ է մոտ 63.3 մլրդ.դրամ, մեկ տարում կրճատվելով 10%, իսկ զուտ շահույթը կազմել է 5.7 մլրդ.դրամ, տարկան կտրվածքով կրճատվելով 1%:

 Հունիսի 26 ին Հայաստանում Մեծ Բրիտանիայի դեսպան Քեթրին Լիչը և ԱՄն դեսպան Ջոն Հեֆֆերնը այցելեցին Ամուլսարի հանքավայր և շրջակա գյուղերից երկուսը՝ Գորայք և Գնդեվազ: Այս մասին ԱրմԻնֆո գործակալությանը տեղեկացվել է ՙԳեոթիմ՚ ընկերության մամուլի ծառայությունից:

Աղբյորի համաձայն այցելության նպատակն էր` ծանոթանալ ծրագրի մանրամասներին և Գեոթիմի կողմից Կորպորատիվ սոցիալական պատասխանատվության շրջանակներում իրականացվող համայնքների տնտեսական և սոցիալական զարգացման որոշ ծրագրերի: Այցելության ընթացքում Գեոթիմի և Լիդիանի հանքարդյունաբերական, բնապահպանական և սոցիալական թիմերը ներկայացրեցին մանրամասներ՝ ծրագրի ներկա փուլի, ինչպես նաև Բնապահպանական և սոցիալական ազդեցության գնահատման ընթացքի և Հայաստանում համապատասխան թույլտվությունների տրամադրման վերաբերյալ:

Դեսպան Քեթրին Լիչը այցի ամփոփմանն ասել է.ՙԱնցյալ շաբաթ Մեծ ութնյակի գագաթնաժողովին Մեծ Բրիտանիայի վարչապետ Դեվիդ Քեմերոնը ընդգծեց, որ կարևոր է, որ երկրները և ընկերությունները աշխատեն միասին՝ արդյունահանող ոլորտում համընդհանուր չափանիշների հաստատման ուղղությամբ: Որպես Բրիտանիայիում տեղակայված ընկերություն, Լիդիան ինթերնեյշնլը ներկայացնում է բրիտանական պոտնեցիալ ամենախոշոր ներդրումային ծրագիրը Հայաստանում: Մեզ համար կարևոր է, որ ծրագրին աջակցում են այնպիսի ներդրողներ, ինչպիսիք են Միջազգային ֆինանսական կորպորացիան և Վերակառուցման և զարգացման եվրոպական բանկը, որոնք պահանջում են հանքարդյունաբերության ոլորտում ամենաբարձր միջազգային չափանիշները: Սա ներառում է նաև շրջակա համայնքների տեղեկացվածության և համայնքների համար ծրագրից դրական տնտեսական և սոցիալական օգուտների ապահովում՚:

Դեսպան Ջոն Հեֆֆերնն ասել է.ՙԼիդիան ինթերնեյշնլի Ամուլսարի հանքավայրը ներկայացնում է Հայաստանում կարևոր օտարերկրյա ներդրումային ծրագիր: Քանի որ ընկերության բաժնետերերից շատերը ներդրողներ են ԱՄՆ-ից, ես ցանկություն ունեցա ծրագրին ավելի լավ ծանոթանալու: Ծրագիրը Հայաստանում զգալի տնտեսական ազդեցություն ունենալու պոտենցիալ ունի և մենք հույս ունենք, որ այն օրինակ կլինի առ այն, որ հանքարդյունաբերական ընկերությունը կարող է գործել պատասխանատու՝ միջազգային լավագույն փորձին համապատասխան՚:

Նշենք, որ Գեոթիմ ՓԲԸ-ն Լիդիան ինթերնեյշնլի դուստր ձեռնարկությունն է: Լիդիանի ներդրողների շարքում են այնպիսի ճանաչված ներդրումային հաստատություններ, ինչպիսիք են Նյու-Յորքում տեղակայված Ամբեր կապիտալը (Amber Capital), Ֆըրսթ իգլ ինվեսթմենթ մենեջմենթը (First Eagle Investment Management), Ֆրենքլին թեմփլթոնը(Franklin Templeton) և Ինվեսկո Թրիմարկ Կանադան (Invesco Trimark Canada): Ընկերության խոշոր և երկարամյա ներդրողներն են Միջազգային ֆինանսական կորպորացիան (ՄՖԿ, Համաշխարհային բանկի խմբի անդամ) և Վերակառուցման և զարգացման եվրոպական բանկը (ՎԶԵԲ): Նրանք շարունակական հսկողության տակ են պահում Լիդիանի և Գեոթիմի աշխատանքը, հետևելով, որ ծրագիրն իրականացվի ՙԷկվատորյան չափանիշների՚ պահանջներին համահունչ և պահպանվեն դրանցով կառավարվող բնապահպանական և սոցիալական չափանիշները, որոնց պատրաստակամ են հետևել Լիդիանն ու Գեոթիմը:

 IP-TV ծառայությունը  (ինտերակտիվ հեռուստատեսություն) պետք է ԱրմենՏել ընկերության կողմից գործարկվի որակյալ և սեղմ ժամկետներում: Այս մասին այսօր Երևանում կայացած մամուլի ասուլիսում հայտարարել է ՙԱրմենՏել՚ ՓԲԸ նորանշանակ գլխավոր տնօրեն Անդրեյ Պյատախինը։

ՙՄենք պատշաճ որակով IPTV–ի գործարկման խնդիր ենք դրել այն ժամանակ, երբ կկարողանանք դա անել՚,– ընկերության գլխավոր տնօրենի պաշտոնում առաջին ասուլիսի ժամանակ ասել է նա։

Նա նշել է, որ ԱրմենՏելի հաճախորդները շահագրգռված են այդ ծառայության  օգտագործմամբ, ափսոսանք հայտնելով, որ այն դեռ գոյություն չունի։ ՙՉեք հավատա, սակայն իմ առաջին աշխատանքային օրը ես հարցրեցի, թե ինչու այստեղ չկա IPTV՚,– ասել է նա։ Սակայն, նա դժվարացել է ծառայության գործարկման կոնկրետ ժամկետներ նշել, միայն հայտնելով, որ մինչ այդ ԱրմենՏելը դեռ շատ բան ունի համաձայնեցնելու կարգավորող մարմինների հետ։

ՙԿան բաներ, որոնք մենք տեխնոլոգիապես պետք է անենք, որպեսզի մեր բաժանորդները որակյալ ծառայություն ստանան,– ընդգծել է նա։
ԱրմենՏելի նոր գլխավոր տնօրենը հիշեցրել է նաև, որ այդ բնագավառում մեծ աշխատանք է կատարվել, և այժմ նրանք պետք է Հայաստանի համար առավել օպտիմալ տեխնոլոգիա ընտրեն, որպեսզի այդ ծառայությունը գործարկվի սեղմ ժամկետներում։

ՙԻմ անձնական խնդիրն է որքան հնարավոր է շուտ դա անել՚,– ասել է Պյատախինը։

Նշենք որ ՙԱրմենՏել՚ ՓԲԸ-ն (Beeline ապրանքանիշ) հանդիսանում է ՙՎիմպելԿոմ՚ ընկերությունների խմբի մի մասը: ՎիմպելԿոմը հանդիսանում է աշխարհի խոշորագույն ինտեգրված օպերատորներից մեկը, որն ընդգրկում է մի շարք հեռահաղորդակցության ընկերություններ, որոնք մատուցում են ինչպես անլար և ամրակցված կապի տեխնոլոգիաների լայն շրջանակի վրա հիմնված ձայնային կապի ու տվյալների հաղորդման,  այնպես էլ լայնաշերտ ինտերնետ հասանելիության ծառայություններ։

Հունիսի 26-ին Կոմիտասի անվան կամերային երաժշտության տանը տեղի ունեցավ Թալալյան եղբայրների անվան միջազգային ամենամյա 4-րդ փառատոնի բացման միջոցառումը: Փառատոնի համերգային ծրագրերի շարքը մեկնարկեց  ՙԱրս լունգա՚ դուետի նոր նախագծի` ՙՀայ կամերային երաժշտության անթոլոգիա՚ (Մաս I. Ստեղծագործություններ  թավջութակի և դաշնամուրի համար) ձայնասկավառակների շնորհանդեսով:

ՙԱրս Լունգա՚ դուետի և ՎիվաՍել-ՄՏՍ-ի համագործակցության արդյունքում թողարկվել է խտասկավառակների նոր հավաքածու: Իրականացվել է հայ երաժշտության պատմության մեջ իր ձևով և բովանդակությամբ եզակի մի ծրագիր, որը կրում է ՙՀայ կամերային երաժշտության անթոլոգիա՚ խորագիրը: Նախաձեռնության իրականացման գաղափարը  ՙԱրս լունգա՚ դուետինն է (Արամ Թալալյան և Ջուլիետա Վարդանյան): Այն կյանքի է կոչվել ՎիվաՍել-ՄՏՍ-ի գլխավոր հովանավորությամբ և ՀՀ մշակույթի նախարարության աջակցությամբ: Նախագծի շնորհանդեսն իրականացվել է Թալալյան եղբայրների անվան միջազգային ամենամյա 4-րդ փառատոնի բացման միջոցառման շրջանակում:

Ծրագիրը ներառում է 20-րդ դարի սկզբից մինչև մեր օրերը ներկայացնող հայ ակադեմիական երաժշտական մտքի լայն սպեկտր,այդ թվում` երիտասարդ սերնդի ներկայացուցիչների ստեղծագործություններ: ՙԱրս լունգա՚ դուետը հավաքել է 20-21-րդ դդ. հայ 60 կոմպոզիտորների  թավջութակի և դաշնամուրի   համար  գրված  ստեղծագործությունները, դրանք կատարվել և ձայանգրվել են` ժամանակակից տեխնիկայի վերջին պահանջներին համապատասխան: Արդյունքում թողարկվել են ձայնագրությունների ժողովածուներ, որոնցից կազմված յուրաքանչյուր ավարտուն տուփն (12 ձայնասկավառակ) ամփոփում է այդ շարքում ընդգրկված հեղինակների կենսագրականները ներառող գրքույկով:

ՙՀոգևոր ժառանգությունը բաց մատյան չէ և հնարավոր չէ այն մեկ ակնթարթում ներկայացնել աշխարհին: Խելացի է այն ազգը, որին հաջողվում է դա անել իմաստուն ձևով և չփոշիացնել դարերի ձեռքբերումը: Այդ առումով չափազանց կարևոր են այսօրինակ նախաձեռնությունները: Դրանք մեկնաբանում են մեր անցյալը և ստեղծում են ապագան՚,- նշել է ՎիվաՍել-ՄՏՍ-ի գլխավոր տնօրեն Ռալֆ Յիրիկյանը:

Ձայնագրությունների ժողովածուները նախատեսված չեն վաճառքի համար: Դրանք տրամադրվելու են աշխարհի խոշոր համալսարանների  գրադարաններին, երաժշտական փառատոներին, երաժշտական քոլեջներին և ինստիտուտներին, կոմպոզիտորների միություններին, դասական երաժշտություն պրոպագանդող ռադիոկայաններին:

ՙՀայ կամերային երաժշտության անթոլոգիա՚ ծրագիրը բաղկացած է մի քանի մասից: ՙԱրս լունգա՚ դուետը նախատեսում է շարունակել ձայնագրությունների շարքը` այն համալրելով հայ կոմպոզիտորների կամերային այլ ստեղծագործություններով. դաշնամուրային եռյակ, քառյակ, հնգյակ և այլն: Շնորհանդեսին իրենց ներկայությամբ պատվել էին ծրագրում ընդգրկված ստեղծագործությունների կոմպոզիտորները Հայասանից և սփյուռքից:

 ՀՀ վարչապետ Տիգրան Սարգսյանը հունիսի 27-ին կառավարության նիստի ժամանակ հեքիաթներ է անվանել մամուլում տարածված օֆշորային սկանդալը:

ՙԻնչ հեքիաթներ ասես չեն հորինում` փորձելով վարկաբեկել։ Ամբողջական տեղեկությունը հասանելի է լինելու զանգվածային լրատվության միջոցներին, և այն, որ քրեական գործ է հարուցված, որ իրավապահ մարմիններն զբաղվում են այդ հարցով: Ես համոզված եմ, որ որևիցե անպատասխան հարց չի մնալու, և եթե հետաքննող լրագրողները լինեն բարեխիղճ, օբյեկտիվ, ապա կարող են թացը չորից զանազանել, և այստեղ էլ մենք հետամուտ ենք լինելու, որպեսզի ամբողջական տեղեկատվությունը հասանելի լինի և՛ հասարակությանը, և՛ զանգվածային լրատվության միջոցներին՚,- ասել է վարչապետը:

Սարգսյանն անդրադարձել է նաև ԶԼՄ-ներում կառավարության հասցեին հնչող մի շարք այլ մեղադրանքների: ՙԱռաջինը ՙՀազարամյակի մարտահրավերներ՚ ծրագրի հետ կապված խնդիրն է` 14 միլիոն ԱՄՆ դոլար, որը ծախսվել է դասախոսությունների վրա։ Մենք մանրակրկիտ տեղեկություն տրամադրել ենք զանգվածային լրատվության միջոցներին, բայց այդ թեման նորից շարունակում են շոշափել ինչ-որ ենթատեքստերով, թե այդ միջոցները փոշիացվել են և այլն։ Եվս մեկ անգամ այդ ամբողջական տեղեկատվությունն այսօր կտրամադրվի զանգվածային լրատվության միջոցներին, որպեսզի մենք վերացնենք այն քաղաքական սպեկուլյացիաների հիմքերը, որոնցով շատ հաճախ անարդարացի օգտվում են ոչ բարեխիղճ լրագրողները։ Այդ ֆինանսական միջոցների բաշխման վերաբերյալ պայմանագրերը կնքված են եղել 2007 թվականին, երբ նույնիսկ ստեղծված չէր գործակալությունը։ Մրցույթն անցկացրել է ամերիկյան կողմը, իրենք են հաղթողին ճանաչել, իրենք էլ պայմանագիրը կնքել են, իրենք էլ դրամաշնորհը տվել են և աուդիտ են իրականացրել, արդյունքներն էլ գնահատել են խիստ արդյունավետ։ Թե ինչ ենթատեքստեր են այստեղ որոնում մեզ քննադատողները, ուղղակի հասկանալի չէ, և ևս մեկ անգամ այդ ամբողջական տեղեկությունը կտրամադրվի այսօր զանգվածային լրատվության միջոցներին։ Թե 14 միլիոնի հետ կապված ինչ խնդիր կա ընդհանրապես, և մեղադրանքի իմաստն ինչ է, անհասկանալի է։

Երկրորդը ՙՆաիրիտ՚ գործարանի խնդիրն է: Արդեն բավական երկար ժամանակ լրատվամիջոցները մեծ ռեսուրսներ են ծախսում, անհասկանալի ինչ-որ սցենարներ են նկարագրում և փորձում են կապել այդ ամենը վարչապետի անվան հետ։ Բոլոր ծրագրերը, որոնք առնչվում են ՙՆաիրիտ՚-ին, ունեն հիմք. դրանք կառավարության որոշումներն են` 2001 թվականի, 2006 թվականի, երբ կառավարությունն ստորագրել է պայմանագիր ՙՌայնովիլ՞ ընկերության հետ։ Դրանից հետո էլ բոլոր գործարքների վերաբերյալ, - ինչ գործարքներ եղել են, ինչ պայմանագրեր ստորագրել են, - ես հանձնարարել եմ մեր լրատվական ծառայությանը, որ այսօր ամբողջական փաթեթը տրամադրվի զանգվածային լրատվության միջոցներին, որպեսզի այստեղ քաղաքական սպեկուլյացիա չլինի՚,- ասել է վարչապետը:

Կառավարության ղեկավարն անդրադարձել է նաև Վերահսկիչ պալատի հաշվետվությանը:
ՙԿառավարության նախորդ նիստում մենք խոսում էինք Վերահսկիչ պալատի հաշվետվության մասին, և ես հանձնարարել եմ բոլոր գերատեսչություններին հրապարակային ձևով ներկայացնել իրենց ոլորտներին վերաբերող ակտերի վերաբերյալ իրենց դիրքորոշումները։ Այսօր ես հանձնարարում եմ Վաչե Գաբրիելյանին` աշխատակազմի ղեկավարին, որպեսզի նա կազմի ժամանակացույց` ձեզ հետ նախապես համաձայնեցնելով, որպեսզի բոլոր գերատեսչությունների ղեկավարները, նախարարները հանդիպեն զանգվածային լրատվության միջոցներին և իրենք պատասխանեն բոլոր այն հարցերին, որոնք այսօր հետաքրքրում են մեր հանրությանը։ Սա պարտադիր պայման է, որ բոլոր այն հարցերը, որոնք արձանագրվել են Վերահսկիչ պալատի հաշվետվության մեջ, գերատեսչությունների ղեկավարների, նախարարների կողմից պետք է անպայման պատասխան ստանան։ Անպատասխան որևիցե հարց չպետք է մնա։ Սա է ճանապարհը, որով մենք շարժվելու ենք առաջ՚,- ասել է Տիգրան Սարգսյանը: